بھارت میں ایک کرکٹ میچ کے دوران امپائر کی فیصلے حمایت کی سزا تماشائی کو اس کی جان لے کر دی گئی بے دردی سے قتل کردیا گیا۔
بھارتی میڈیا کے مطابق یہ انسانیت سوز واقعہ ریاست اوڑیسا کے ضلع کوٹک میں اتوار کو ایک کرکٹ میچ کے دوران پیش آیا جہاں دو ٹیموں برہم پور اور سنکر پور کے درمیان میچ کھیلا جا رہا تھا۔
مقامی پولیس کا کہنا ہے کہ دوپہر کے وقت جب میچ جاری تھا کہ برہم پور کے بلے باز کے خلاف مخالف ٹیم نے وکٹوں کے پیچھے کیچ آؤٹ ہونے کی اپیل کی اور امپائر نے اسے آؤٹ بھی قرار دے دیا۔
تاہم بیٹنگ کرنے والی ٹیم کو امپائر کا فیصلہ پسند نہ آیا اور اس نے امپائر پر دباؤ ڈالا کہ وہ اپنا فیصلہ بدل کر اسے ’نو بال‘ قرار دے۔
اس دوران گراؤنڈ میں میچ دیکھنے کے لیے آئے ہوئے 22 سالہ نوجوان نے اپنی جگہ بیٹھے ہوئے امپائر کے فیصلے کی حمایت کرنے کی کوشش کی تو چند افراد نے مبینہ طور پر اسے مارا پیٹا اور تیز دھار آلے سے اس پر حملہ کر دیا۔
پولیس نے نوجوان کو زخمی حالت میں مقامی اسپتال منتقل کیا لیکن وہ دوران علاج ہی زخموں کی تاب نہ لاتے ہوئے چل بسا۔ پولیس کا کہنا ہے کہ نوجوان پر حملہ کرنے والے افراد کی شناخت کرلی گئی ہے اور جلد انہیں گرفتار کر لیا جائے گا۔