لاہور ہائیکورٹ کے واضح حکم کے باوجود الیکشن شیڈول جاری نہ کرنے پر گورنر پنجاب اور الیکشن کمیشن کے خلاف توہین عدالت کی درخواست دائر کردی گئی ہے۔
اے آر وائی نیوز کے مطابق لاہور ہائیکورٹ کی جانب سے صوبہ پنجاب میں الیکشن شیڈول جاری کرنے کے واضح حکم کے باوجود انتخابات کا شیڈول جاری نہ کرنے پر گورنر پنجاب بلیغ الرحمٰن اور الیکشن کمیشن کے خلاف عدالت عالیہ میں توہین عدالت کی درخواست دائر کر دی گئی ہے۔
شہری منیر احمد کی جانب سے اظہر صدیق ایڈووکیٹ کی معرفت دائر درخواست میں موقف اختیار کیا گیا ہے کہ لاہور ہائیکورٹ نے پنجاب میں فوری انتخابی شیڈول جاری کرنے کا حکم دیا تھا اور اتوار کی رات تک انتخابی شیڈول دینا لازمی تھا۔ تاہم عدالتی حکم کے باوجود انتخابات کی تاریخ نہیں دی گئی ہے۔
درخواست میں مزید کہا گیا ہے کہ آٸین کے تحت 90 روز میں الیکشن کروانا لازمی ہے اس کے مطابق 60 روز باقی رہ گئے ہیں اور الیکشن شیڈول جاری نہ ہونے سے آئینی بحران پیدا ہونے کا خدشہ ہے۔ گورنر اور الیکشن کمیشن آٸین کے تحت ذمے داری ادا نہیں کر رہے ہیں۔
درخواست میں استدعا کی گٸی کہ عدالتی حکم عدولی پر گورنر پنجاب، چیف الیکشن کمشنر سمیت دیگر کے خلاف توہین عدالت کی کارروائی کی جائے۔
دوسری جانب پی ٹی آئی رہنما فواد چوہدری نے سماجی رابطوں کی ویب سائٹ ٹوئٹر پر کہا ہے کہ الیکشن کمیشن ممبران، گورنر پنجاب کے خلاف توہین عدالت کی درخواست دائر کردی گئی ہے۔
یہ بھی پڑھیں: الیکشن کمیشن پنجاب میں فوری انتخابات کی تاریخ دے، تحریری فیصلہ
فواد چوہدری نے اپنے ٹوئٹ میں کہا کہ اظہر صدیق ایڈووکیٹ نے انتخابات کی تاریخ نہ دینے پر لاہور ہائیکورٹ میں درخواست دائر کی ہے۔
لاہور ہائیکورٹ میں الیکشن کمیشن کے ممبران اور گورنر پنجاب کے خلاف توہین عدالت کی درخواست دائر کر دی گئ ہے، اظہر صدیق ایڈوکیٹ نے لاہور ہائیکورٹ کے واضع احکامات کے باوجود انتخابات کی تاریخ نہ دینے پر یہ درخواست دائر کی ہے
— Ch Fawad Hussain (@fawadchaudhry) February 13, 2023