لاہور: گورنرپنجاب چوہدری محمد سرور کا کہنا ہے کہ حکومت چھوٹے کاروباری طبقے کے لیے آسانیاں پیدا کررہی ہے، اہم سہولتیں میسر آئیں گی۔
تفصیلات کے مطابق گورنرپنجاب چوہدری سرور سے بزنس کمیونٹی کے وفد نے ملاقات کی اس موقع پر ملک میں کاروباری شعبے کے حوالے سے تبادلہ خیال کیا گیا اور کورونا صورت حال پر بھی روشنی ڈالی گئی۔
چوہدری محمد سرور نے کہا کہ وزیراعظم کا ریاست مدینہ کا مشن ضرور کامیاب ہوگا، سیاسی مخالفین اچھے کام میں رکاوٹیں ڈالنے کی پالیسی پر گامزن ہیں۔
ان کا کہنا تھا کہ ناانصافی کے خاتمے کے لیے حکومت عملی اقدامات کررہی ہے۔
گورنر نے بتایا کہ عوام کو مہنگائی سے نجات دلانا حکومت کی اولین ترجیح ہے، معاشی کامیابیوں کوعالمی ادارے تسلیم کررہے ہیں، حکومت چھوٹے کاروباری طبقے کیلئے آسانیاں پیدا کررہی ہے۔
انہوں نے مزید کہا کہ ہماری انڈسٹری، زراعت اور خدمات کے شعبے بہتر ہورہے ہیں۔
