کینیا میں پولیس کی گولی سے شہید ہونے والے پاکستان کے ہر دلعزیز سینیئر صحافی اور اینکر ارشد شریف کا جسد خاکی آنے سے قبل ان کی رہائشگاہ کے باہر پھول بچھا دیے گئے ہیں۔
اے آر وائی نیوز کے مطابق شہید ارشد شریف سے محبت اور عقیدت کے اظہار کیلیے پاکستان بھر سے لوگوں کی ان کی رہائشگاہ پر آمد کا سلسلہ جاری ہے، طلبہ، اساتذہ، بیوروکریٹس، سیاستدان، تاجر، ڈاکٹرز وکلا سمیت تمام شعبہ زندگی سے تعلق رکھنے والے افراد ان کی رہائشگاہ پہنچ کر ان کی جراتوں کو سلام پیش کرتے ہوئے پھولوں کے گلدستے رکھ رہے ہیں۔
گزشتہ شب شہید کی والدہ نے اپنے مختصر ویڈیو پیغام میں یہ خواہش ظاہر کی تھی کہ ان کے بیٹے کو شایان شان طریقے سے رخصت کیا جائے، ان کے بیٹے کا سفر آخرت اچھا ہو اور جنازہ پھولوں سے لدا ہو۔
دکھیاری ماں کی خواہش پوری کرتے ہوئے شہید ارشد شریف سے محبت کرنے والوں نے ان کے گھر کے باہر اور آنے والے راستوں کو علی الصباح پھولوں سے ڈھک دیا ہے۔
سڑک پر ہر جانب پھول نچھاور کردیے گئے ہیں اور لوگوں کی آمد کا سلسلہ بدستور جاری ہے۔
ارشد شریف کی نماز جنازہ آج بعد نماز ظہر شاہ فیصل مسجد اسلام آباد میں ادا کی جائیگی اور وفاقی دارالحکومت میں ہی تدفین ہوگی۔
مزید پڑھیں: ارشد شریف شہید کی نماز جنازہ آج ہوگی
شہید کی میت کچھ دیر میں قائداعظم اسپتال سے ان کی رہائشگاہ منتقل کردی جائیگی۔
