واشنگٹن: امریکی صدر ڈونلڈ ٹرمپ نے دعویٰ کیا ہے کہ ہلاک ہونے والے داعش کے سربراہ ابوبکر بغدادی کی بیوی اور بہن گرفتار ہوچکی ہیں۔
تفصیلات کے مطابق امریکی صدر نے ترک ہم منصب رجب طیب اردوان سے ٹیلی فونک رابطہ کیا اس دوران انہیں اطلاع دی گئی کہ ترک فورسز کے ہاتھوں بغدادی کی بہن اور بیوی گرفتار ہوئیں۔
Just had a very good call with President @RTErdogan of Turkey. He informed me that they have captured numerous ISIS fighters that were reported to have escaped during the conflict – including a wife and sister of terrorist killer al Baghdadi….
— Donald J. Trump (@realDonaldTrump) November 6, 2019
غیر ملکی خبررساں ادارے کے مطابق سماجی رابطے کی ویب سائٹ ٹوئٹر پر ٹرمپ نے دعویٰ کیا کہ ترک صدر اردوان سے فون پر بہت اچھی گفتگو ہوئی، اردوان نے اطلاع دی کہ انہوں نے متعدد داعش جنگجوؤں کو گرفتار کیا ہے۔
ان کا کہنا تھا کہ گرفتار داعش جنگجوؤں میں بغدادی کی بیوی اور بہن بھی شامل ہے، ترک صدر سے شام کے ساتھ ان کے سرحدی معاملات پر بھی بات ہوئی۔
امریکی صدر نے بتایا کہ اردوان سے کردوں سے محاذ آرائی اور دہشت گردی کے خاتمے پر بھی گفتگو ہوئی، وائٹ ہاؤس میں اگلے بدھ کو ترک صدر کا منتظر ہوں۔
یاد رہے کہ 5 نومبر کو ترک حکام نے دعویٰ کیا تھا کہ فورسز نے شمالی شام کے علاقے سے ابوبکر بغدادی کی بہن کو گرفتار کرلیا ہے، ترک عہدیدار کا کہنا تھا کہ گرفتار ہونے والوں میں ابوبکر بغدادی کی بہن، ان کے شوہر اور بہو شامل ہیں، جن سے پوچھ گچھ جاری ہے۔
واضح رہے کہ 27 اکتوبر کو امریکا نے ابوبکر بغدادی کو ہلاک کرنے کا دعویٰ کیا تھا اور تین دن بعد حملے کی ویڈیو بھی جاری کی۔بعدازاں داعش کی جانب سے ابوبکر البغدادی کی ہلاکت کی تصدیق کی گئی اور ساتھ ہی تنظیم کے نئے سربراہ ابو ابراہیم الہاشمی القریشی کا اعلان کیا تھا۔