پاکستان شوبز انڈسٹری کے معروف اداکار آغا علی نے اداکارہ حنا الطاف سے اپنی طلاق کی تصدیق کی ہے۔
حال ہی میں اداکار آغا علی نے احمد علی بٹ کے پوڈ کاسٹ میں شرکت کی جہاں انہوں نے سابقہ بیوی حنا الطاف کے بارے میں بھی بات کی۔
آغا علی کی شادی حنا الطاف سے ہوئی تھی لیکن شادی کے تین سال بعد دونوں نے علیحدگی اختیار کرلی، آغا علی اور حنا الطاف کی طلاق کی خبروں نے اس وقت زور پکڑا تھا جب دونوں نے ایک دوسرے کو انسٹاگرام پر ان فالو کردیا تھا۔
اس افواہوں کے بعد آغا علی نے اپنے انسٹاگرام اکاؤنٹ سے حنا الطاف کے ساتھ شیئر کی گئی تمام تصاویر حذف کیں جس نے اس بات کی تصدیق کی کہ دونوں کی محبت اور شادی تنازع کا شکار ہوگئی ہے۔
تاہم اب ان تمام تر افواہوں کے بعد بالآخر خود اداکار آغا علی نے حنا الطاف سے طلاق کی تصدیق کرکے ان افواہوں کو سچ ثابت کردیا۔
اداکار آغا علی نے طلاق کی تصدیق کرتے ہوئے کہا کہ میں نے طلاق کے بعد ایک بہت بڑا سبق حاصل کرلیا ہے کیونکہ اس طلاق نے میری اپنی زندگی پر نئے سرے سے غور کرنے کا موقع دیا۔
آغا علی کا کہنا تھا کہ میں ٹھیک ہوں، دراصل اب میں الحمدللہ بہت بہتر ہوں اب میں یہ کہہ سکتا ہوں کہ میں خوش ہوں اور میرا خیال ہے کہ آپ اپنی زندگی میں جتنے بھی رشتے بناتے ہیں، وہ آپ کی خوشی اور مرضی سے بنتے ہیں۔
اداکار کا کہنا تھا کہ اس لیے ان رشتوں کا خیال رکھنا چاہیے آپ کو پوری کوشش کرنی چاہیے کہ ان رشتوں کو کامیاب بنایا جائے، لیکن اگر آپ دونوں اس میں ناکام ہو رہے ہیں تو بہترین حل یہی ہے کہ آپ علیحدگی کا راستہ اختیار کریں۔
آغا علی کا کہنا تھا کہ رشتے کو چلانے کے لیے دونوں طرف سے بھرپور محنت ہونی چاہیے، اور جب یہ ممکن نہ ہو تو بہتر ہے کہ تعلق کو ختم کر دیا جائے تاکہ دونوں فریقین اپنی زندگی میں آگے بڑھ سکیں۔
واضح رہے کہ آغا علی اور حنا الطاف کی شادی کووڈ کے دوران مئی 2020 میں ہوئی تھی جب کہ 2022 میں ان کے درمیان علیحدگی کی افواہیں گردش کرنے لگیں جسے آغا علی نے مسترد کر دیا تھا۔
