ملتان : ہائیکورٹ چوک کے قریب ایک شخص نے انسداد ڈینگی کی خاتون ٹیم پر کتے چھوڑ دیے جس کے نتیجے میں محکمہ صحت کی ایک خاتون اہلکار زخمی ہوگئی۔
تفصیلات کے مطابق ضلعی حکومت کی جانب سے انسداد ڈینگی ٹیمیں تشکیل دی گئیں جن کے ذمے گھر گھر جا کر ڈینگی لاروا چیک کرنا تھا۔ ہائیکورٹ چوک کے قریب جب انسداد ڈینگی ٹیم ایک گھر میں گئی تو مالک مکان نے ٹیم پر کتے چھوڑ دیے جس کے باعث ٹیم کی خاتون رکن فوزیہ شدید زخمی ہوگئی جسے نشتر ہسپتال منتقل کردیا گیا ہے۔
دوسری طرف مالک مکان کا کہنا ہے کہ پالتو کتا برقع پوش خاتون کو دیکھ کر اس کے پیچھے بھاگا جب کہ واقعہ کے خلاف اہل علاقہ نے شدید احتجاج کرتے ہوئے کتے چھوڑنے والے شخص کے خلاف کارروائی کا مطالبہ کیا۔
واقعہ کی اطلاع ملنے بعد ڈی سی او ملتان نے انسداد ڈینگی ٹیم پر کتے چھوڑنے والے شخص کے خلاف مقدمہ درج کرنے کاحکم دے دیا ہے جس کے بعد مقامی پولیس نے متعلقہ شخص کے خلاف مقدمہ درج کر کے گرفتار کر لیا ہے۔
واضح رہے اس سے انسداد پولیو مہم کی ٹیم پر بھی کئی علاقوں میں حملے ہو چکے ہیں جن میں ہلاک اور زخمی ہونے والی زیادہ تر خواتین ہی ہوتی ہیں اور آج انسداد ڈینگی مہم میں شامل خاتون رضاکار پر کتے چھوڑنا باعثِ تشویش ہے جس کے سدباب کے لیے حکومت کو اہم اقدامات کرنے کی ضرورت ہے۔
