اسلام آباد: استحکام پاکستان پارٹی کے صدر عبدالعلیم خان نے اعظم خان کے انکشافات پر ردعمل میں کہا کہ آگےآگے دیکھئے ہوتا ہے کیا۔
استحکام پاکستان پارٹی کے صدر عبدالعلیم خان نے کہا ہے کہ قوم کو گمراہ کرنے والوں کا پردہ چاک، ایک مرتبہ پھر سازشیں بے نقاب ہوئیں، جھوٹ، گمراہ کن بیانیہ فتنے کی سیاست کو کسی طور تحفظ نہیں دے سکتا۔
عبدالعلیم خان کا کہنا تھا کہ پی ٹی آئی کی سازشی سیاست نے ملکی معیشت اور خارجہ تعلقات تباہ کر دیے، سابقہ دور میں وزیر اعظم ہاؤس گھناؤنی سازشوں کا گڑھ بنا رہا، اعظم خان کا بیان حقائق واضح کرنے کیلئے کافی ہے، مزید لوگ بھی بولیں گے۔
سائفر ڈرامہ : چیئرمین پی ٹی آئی کے پرنسپل سیکریٹری اعظم خان کے تہلکہ خیز انکشافات
ان کا کہنا تھا کہ سائفرکو سازش بنا کر ملکی سلامتی سے کھیلا گیا، قرار واقعی سزا ملنی چاہیے، اس اعتراف سے ثابت ہوگیا استحکام پاکستان پارٹی کیوں وجود میں آئی۔
عبدالعلیم خان نے مزید کہا کہ ہم ایسے ملک دشمن اور مکروہ ذہن کے ساتھ نہیں چل سکتے تھے، واضح ہو گیا سیاسی مقاصد کیلئے رچایا گیا سائفر کا ڈرامہ ایک شخص کا اسکرپٹ تھا۔
