اسلام آباد : اقتصادی رابطہ کمیٹی نے الیکٹرک پاور ایکٹ1997میں ترمیم کی منظوری دے دی ، اب نیپرا سالانہ اور سہ ماہی بنیادوں پر ٹیرف کا تعین کرسکے گا۔
تفصیلات کے مطابق مشیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس ہوا، اجلاس میں پاور ایکٹ 1997میں ترامیم کی منظوری دی گئی، وزارت توانائی نےپیداوار،ترسیل،تقسیم میں ترامیم تجویزکی تھیں۔
وزارت خزانہ نے کہا بجلی کے یکساں ٹیرف، مارکیٹ آپریشن اورتعین کے اموربہتر ہوں گے ، نیپرا سالانہ اور سہ ماہی بنیادوں پر ٹیرف کا تعین کرسکے گا، ای سی سی نےنیپرا ایکٹ میں تجویز ترامیم میں تصحیح بھی کی، وزارت توانائی ترامیم کی کابینہ اور پارلیمنٹ سے منظوری لے گی۔
یاد رہے 30 دسمبر کو کابینہ کی اقتصادی رابطہ کمیٹی نے 15جنوری سے کپاس کی درآمد پرعائد 10فیصد ڈیوٹیاں ختم کرنے اور وسط ایشیائی ریاستوں کی کپاس کو طور خم سے درآمد کرنے کی اجازت دی تھی، فیصلے سے ٹیکسٹائل برآمدات بڑھانے میں مدد ملےگی۔
کمیٹی نے پاک فوج کے اسپیشل سیکیورٹی ڈویژن کیلے 6ارب 20کروڑ روپے کی اضافی گرانٹ کی بھی منظوری دی تھی جبکہ تیل وگیس کی تلاش کا کام کرنے والی دو سرکاری کمپنیوں کو ابوظہبی میں تیل وگیس کی تلاش کی اجازت بھی دی۔
