اسلام آباد: مشیر خزانہ ڈاکٹر عبد الحفیظ شیخ کی زیر صدارت اقتصادی رابطہ کمیٹی کا پہلا اجلاس آج ہوگا، اجلاس میں 18 نکاتی ایجنڈے پر غور کیا جائے گا۔
تفصیلات کے مطابق اسد عمر کے استعفیٰ کے بعد اقتصادی رابطہ کمیٹی کا پہلا اجلاس آج ہوگا ، مشیر خزانہ ڈاکٹرعبدالحفیظ شیخ صدارت کریں گے،
وزارت داخلہ کے لیے 3 کروڑ 72 لاکھ روپے کے اضافی فنڈز مختص کرنے کا معاملہ بھی اجلاس میں زیرغور آئے گا۔
اجلاس میں اسٹیل ملز کی بحالی سے متعلق پلان پیش کیا جائےگا ،اسٹیل ملز کی بحالی کے لیے ٹرانزیکشن ایڈوائزری کنسورشیم کے تقرر کی سمری پیش کی جائے گی۔
ڈاکٹرعبد الحفیظ شیخ کی زیرصدارت اجلاس میں پنجاب رینجرز کے لیے ضمنی گرانٹس کی سمری پیش کی جائے گی۔
اجلاس میں ایکسپلوزوز ڈیپارٹمنٹ کے لیے تکنیکی ضمنی گرانٹ اور نیشنل سیونگز آرگنائزیشن کے لیے 54 کروڑ روپے کی ضمنی گرانٹ کی سمری پیش کی جائے گی۔
اقتصادی رابطہ کمیٹی کے اجلاس میں ای ای او بی آئی کے رواں مالی سال کی نظرثانی شدہ بجٹ تجاویز پیش کی جائیں گی جبکہ جنوبی وزیرستان، خاصہ دار فورس کے لیے تنخواہوں کی ادائیگی کا معاملہ بھی ایجنڈے میں شامل ہے۔
ڈاکٹرعبد الحفیظ شیخ کی زیرصدارت اجلاس میں ملک میں ایک ہزار انڈسٹریل اسٹچنگ یونٹس کے لیے ضمنی گرانٹس کا معاملہ زیر غور آئے گا۔
