بھارت سے علاج کے بغیر واپس بھیجے گئے دونوں بچوں کی کامیاب سرجری کردی گئی۔
اے ایف آئی سی راولپنڈی میں 9 سالہ عبداللہ اور 7 سالہ منسا کی سرجری کی گئی، والد نے فیلڈ مارشل عاصم منیر کا شکریہ ادا کیا۔
شاہد احمد نے کہا کہ فیلڈ مارشل عاصم منیر نے معاملے کا فوری نوٹس لیا اور بچوں کی سرجری کی ذمہ داری اٹھائی۔
انہوں نے کہا کہ ’’الحمدللہ، میرے بچے اب کافی بہتر ہیں، میں خود بھی مریض ہوں، شاید صدمہ برداشت نہ کر پاتا۔ ڈاکٹروں نے بہت محنت کی جو قابل تعریف ہے۔ اے ایف آئی سی بہترین ادارہ ہے۔‘‘
اے ایف آئی سی کے ڈاکٹروں نے سرجری کامیاب بنائی، کمانڈنٹ ایگزیکٹو ڈائریکٹر اے ایف آئی سی میجر جنرل ریٹائرڈ ڈاکٹر نصیر احمد سومرو نے بتایا کہ ٹیم نے بچوں کا علاج ترتیب دیا اور اللہ نے کامیابی دی۔
واضح رہے کہ دونوں بہن بھائیوں کا علاج بھارت میں جاری تھا، تاہم پاک بھارت کشیدگی کے باعث بھارتی حکومت نے دونوں بچوں کو واپس پاکستان بھیج دیا تھا۔
ڈپٹی کمانڈنٹ بریگیڈیئر ڈاکٹر خرم اختر نے بتایا کہ عبداللہ اور منسا کو پیچیدہ دل کی بیماری تھی، جس کے باعث سرجری ایک مرحلے میں ممکن نہیں تھی۔
بریگیڈیئر ڈاکٹر خرم اختر نے کہا کہ ’’عبداللہ کی سرجری پانچ سے چھ گھنٹے پر محیط تھی جو کامیاب رہی۔ ہمارے پاس قابل ٹیم ہے جو بین الاقوامی تربیت یافتہ ہے۔‘‘
