قومی ٹیسٹ ٹیم کے اوپنر عبداللہ شفیق کا کہنا ہے کہ کپتان بابر اعظم میری بیٹنگ کو راہول ڈریوڈ سے تشبیہ دی تو اچھا لگا۔
راولپنڈی میں نیوز کانفرنس کرتے ہوئے قومی ٹیسٹ ٹیم کے اوپنر عبداللہ شفیق نے کہا کہ بابر اعظم ورلڈ کلاس کھلاڑی ہیں ان سے سیکھنے کا موقع ملتا ہے ان کا تمام ٹیم کھلاڑیوں پر اچھا اعتماد ہے۔
انہوں نے کہا کہ میرے پسندیدہ کھلاڑیوں میں رکی پونٹنگ، محمد یوسف اور بابر اعظم شامل ہیں۔
عبداللہ شفیق کا کہنا تھا کہ دورہ سری لنکا میں اچھی کرکٹ کھیلنے کی کوشش کریں گے، پنڈی کرکٹ اسٹیڈیم میں دورہ سری لنکا کے حوالے سے اچھی تیاری ہورہی ہے پنڈی میں جس طرح کا موسم ہے یہ کنڈیشنز سری لنکا میں مددگار ثابت ہوں گی۔
انہوں نے کہا کہ سری لنکا میں چیلنجز مختلف ہوں گے اسی حساب سے تیاری کررہے ہیں۔
ٹیسٹ اوپنر نے کہا کہ آسٹریلیا کے خلاف گزشتہ سیریز میں ہم نے اچھی کرکٹ کھیلی، کپتان بابر اعظم کو جو بہتر لگتا ہے کارکردگی کے حساب سے اس کو موقع ملتا ہے ہم سب اپنی تیاری رکھتے ہیں تاکہ موقع ملنے پر اچھا پرفارم کرسکیں۔
