بالی ووڈ کے معروف اداکار ابھیشیک بچن نے بالآخر اپنی اہلیہ و اداکارہ ایشوریا رائے کے ساتھ طلاق کی خبروں پر ردعمل دے دیا۔
بھارتی میڈیا رپورٹ پر گزشتہ کئی مہینوں سے بالی ووڈ کی معروف اداکارہ ایشوریا رائے بچن اور ابھیشیک بچن کی طلاق کی خبریں سرگرم ہیں۔
دونوں کی طلاق کی افواہیں سرگرم ہونے کی کئی وجوہات بھی ہیں، جوڑے کو کئی دفعہ اکثر تقریبات میں الگ الگ شرکت کرتے ہوئے دیکھا گیا۔
جس تقریب میں بچن فیملی شرکت کرتی ہے تو وہاں ابھیشیک بچن اپنی اہلیہ ایشوریا رائے اور بیٹی آرادھیا کے بجائے اپنے والدین کے ہمراہ انٹری دیتے ہیں۔
دوسری جانب انہی افواہوں کے درمیان ابھیشیک بچن نے طلاق پر مبنی ایک آرٹیکل بھی لائک کیا تھا جس کے بعد اس جوڑی کی علیحدگی کی خبروں نے مزید زور پکڑلیا تھا۔
تاہم، اب ٹائمز آف انڈیا کی جانب سے دعویٰ کیا کہ اداکار ابھیشیک بچن نے برطانیہ کے بھارتی خبررساں ادارے سے گفتگو کرتے ہوئے اپنی طلاق کی خبروں سے متعلق گفتگو کرتے ہوئے اس کی تردیدی کی ہے۔
ٹائمز آف انڈیا نے اپنی رپورٹ میں دعویٰ کیا کہ ابھیشیک بچن نے ’بالی ووڈ یو کے‘ سے گفتگو کرتے ہوئے اُنہیں اپنی شادی کی انگوٹھی دکھائی اور کہا کہ میں ابھی تک شادی شدہ ہوں، علیحدگی کی افواہوں کے بارے میں کہنے کے لیے کچھ نہیں ہے۔
انہوں نے کہا کہ لیکن مجھے افسوس ہوتا ہے کہ لوگ خبروں کی تصدیق کیے بغیر ایسی خبریں پھیلا دیتے ہیں، مجھے معلوم ہے کہ ایسی خبریں کیوں پھیلائی جاتی ہیں کیونکہ میڈیا کو اپنی ویب سائٹس یا اخباروں کے لیے اسٹوریز چاہیے ہوتی ہیں، اسی لیے وہ ایسی جھوٹی خبریں بناکر شائع کردیتے ہیں۔
ابھیشیک بچن نے مزید کہا کہ ٹھیک ہے کوئی بات نہیں، ہم مشہور شخصیات ہیں اور ہمیں اپنی نجی زندگی سے متعلق ایسی خبروں کا سامنا کرنا پڑتا ہے۔
یاد رہے کہ ابھیشیک بچن اور ایشوریا رائے کی شادی سال 2007 میں ہوئی تھی اور ان کے گھر بیٹی آرادھیا کی پیدائش سال 2011 میں ہوئی تھی۔
