لاہور: انسداد دہشت گردی عدالت میں 9مئی کے مقدمات میں اہم پیش رفت سامنے آئی ہے، عدالت نے چالان دوبارہ جمع کروانے کی ہدایت کردی۔
تفصیلات کے مطابق انسداد دہشت گردی عدالت نے سانحہ نو مئی کے مقدمات کا چالان کا جائزہ لینے کے بعد اسے نامکمل ہونے کی بنیاد پر واپس بھجوایا دیا۔
انسداد دہشت گردی عدالت (اے ٹی سی) نے جناح ہاؤس حملہ کیس سمیت گیارہ مقدمات کے چالان واپس بھجوا دیئے۔
عدالت نے مقدمات کے چالان مکمل نہ ہونے کی بنا پر واپس بھجوائے، عدالت نے ضروری دستاویز منسلک کرکے چالان دوبارہ جمع کروانے کی ہدایت کی ہے۔ چالان مکمل ہونے کے بعد عدالت مقدمے میں کارروائی کرے گی۔
ذرائع کے مطابق پراسیکیوشن نے 9مئی واقعات پر 11مقدمات کے چالان جمع کرائے تھے، چالان میں متعدد گواہان کے بیانات اور فوٹو گرامیٹک ٹیسٹ رپورٹس شامل نہیں تھیں۔
دوسری جانب پنجاب حکومت نے ان مقدمات کا ٹراٸل جیل میں کرنے کا فیصلہ کیا ہے، حکومت نے اس حوالے سے اکیس جون کا نوٹیفیکیشن پبلک کردیا۔
نوٹیفکیشن کے مطابق عسکری ٹاور پر حملے، تھانہ شادمان پرحملے اور جلاؤ گھیراؤ کے مقدمے کا ٹرائل بھی جیل میں ہوگا۔پراسیکیوشن نے ملزمان کے خلاف چالان مکمل کر کے عدالت میں جمع کرا رکھے ہیں۔
