لاہور : نومئی کو ہونے والے جناح ہاؤس پر حملے اور جلاؤ گھیراؤ کیس میں اہم پیش رفت سامنے آئی ہے، عدالت نے پولیس کو گرفتار ملزمان کے خلاف نئے الزامات کی بنیاد پر تفتیش کی اجازت دے دی۔
تفصیلات کے مطابق نو مئی کو جلاؤ گھیراؤ اور ہنگامہ آرائی کے الزام میں گرفتار پی ٹی آئی کی گرفتار خواتین رہنماؤں سمیت 68 ملزمان سے پولیس کو نئے الزامات کی بنیاد پر تفتیش کی اجازت مل گئی۔
انسداد دہشت گردی عدالت کے جج اعجاز احمد بٹر نے پولیس کی استدعا منظور کرلی، عدالت نے خدیجہ شاہ، صنم جاوید سمیت68 ملزمان کو دوبارہ شامل تفتیش کرنے کی اجازت دے دی۔
تفتیشی افسر نے انسداد دہشت گردی عدالت میں مزید تحقیقات کیلئے درخواست دائر کی، تفتیشی افسر کا کہنا ہے کہ مقدمے میں بغاوت، جنگ چھیڑنے اور فسادات کی دفعات شامل کردی گئی ہیں۔
مذکورہ افسر کے مطابق ملزمہ خدیجہ شاہ اور دیگر ملزمان جوڈیشل ریمانڈ پر جیل میں ہیں، گرفتار ملزمان پر بغاوت اور جنگ چھیڑنے کاالزام ہے۔
