پاکستان کی نئی دریافت مسٹری اسپنر ابرار احمد نے اپنے پہلے ہی ٹیسٹ میں 11 وکٹیں لے کر ریکارڈ بک میں اپنا نام درج اور ڈیبیو یادگار بنا لیا ہے۔
اے آر وائی نیوز کے مطابق پاکستان اور انگلینڈ کے مابین تین ٹیسٹ میچوں کی سیریز کا دوسرا میچ ملتان میں جاری ہے۔ اس ٹیسٹ میچ میں ڈیبیو کرنے والے پاکستان کی نئی دریافت مسٹری اسپنر ابرار احمد نے پہلے ہی میچ میں 11 انگلش کھلاڑیوں کو پویلین بھیج کر نہ صرف اپنے ڈیبیو کو یادگار بنایا بلکہ وہ پہلے ٹیسٹ میں سب سے زیادہ وکٹیں لینے والے قومی سابق فاسٹ بولر محمد زاہد کے ہم پلہ ہو گئے ہیں۔
پہلی اننگ میں انگلش ٹیم پر اپنی جادوئی بولنگ سے کاری وار کرنے والے ابرار احمد نے 7 کھلاڑیوں کو پویلین واپس بھیجا۔ ان وکٹوں کی خاص بات یہ تھی کہ انگلینڈ کے ابتدائی 7 بلے بازوں کی وکٹیں ان کے حصے میں ہی آئیں۔
ابرار احمد نے اپنی جادوئی بولنگ کا سلسلہ دوسری اننگ میں بھی جاری رکھا اور چار کھلاڑیوں کو آؤٹ کرکے میچ میں مجموعی طور پر 11 وکٹیں حاصل کرنے والے پاکستان کے دوسرے بولر بننے کا اعزاز حاصل کرلیا۔ اس سے قبل یہ اعزاز قومی فاسٹ بولر محمد زاہد کے پاس تھا جس میں اب ابرار احمد بھی شریک ہوگئے ہیں۔
یہ بھی پڑھیں: ملتان ٹیسٹ، انگلینڈ کا پاکستان کو جیت کے لیے 354 رنز کا ہدف
پاکستان کی جانب سے فاسٹ بولر محمد زاہد ڈیبیو پر سب سے زیادہ وکٹ لینےکا اعزاز رکھتے ہیں جنہوں نے نیوزی لینڈ کے خلاف راولپنڈی ٹیسٹ میں 11 وکٹیں لی تھیں۔
