The news is by your side.

Advertisement

امریکا مڈ ٹرم الیکشن، غیر حاضر ووٹر کے لیے پہلے ووٹنگ کی سہولت

ورجینیا: امریکا  میں ہونے والے وسط مدتی انتخابات کی تیاریوں کے سلسلے میں  الیکشن کے روز ملازمت یا دیگر مصروفیات کی بنا پر غیر حاضر ہونے والے ووٹرز کے لیے پیشگی حق رائے دہی استعمال کرنے کا انتظام کیا گیا۔

نمائندہ اے آر وائی جہاں زیب علی کے مطابق امریکا میں چھ نومبر کو وسط مدتی انتخابات (مڈٹرم الیکشن) کا انعقاد کیا جائے گا جس کی تیاریاں حتمی مراحل میں داخل ہوچکی ہیں، الیکشن کے دن مصروف یا غیر حاضر رہنے والے شہریوں نے اپنا حق رائے دہی استعمال کرنا شروع کردیا۔

حکام کے مطابق 6 نومبر کو مصروفیات کے باعث متعدد شہری ووٹ نہیں کاسٹ کرسکیں گے جن کو سہولت دینے کے لیے ورجینیا کی فیئر فیکس کاؤنٹی سینٹر میں Early Voting  کا عمل شروع ہوچکا۔

فیئرفیکس کاؤنٹی سینٹر میں ری پبلکن اور ڈیموکریٹس کے امیدواروں کے پوسٹرز بمعہ تفصیلات آویزاں ہیں اور  دونوں جماعتوں کے کارکنان ووٹرز  کو متاثر کرنے کے لیے وہاں موجود ہیں۔

ووٹنگ سینٹر کے جنرل رجسٹرار گیری سکاٹ کا کہنا تھا کہ انتخابات سے پہلے ووٹ کاسٹ کرنے والے افراد کو پہلے حق رائے دہی استعمال کرنے کے لیے وجہ بتانا ضروری ہے۔ ایک سوال پر رجسٹرار کا کہنا تھا کہ ’ووٹنگ کا یہ طریقہ انتہائی شفاف ہے کیونکہ مشین انٹرنیٹ سے منسلک نہیں ہوتی‘۔

یاد رہے کہ امریکا میں قبل از وقت اور غیر حاضر ووٹرز کی تعداد میں اضافہ ہوتا جارہا ہے، ہزاروں ووٹرز ایسے بھی ہیں جو اپنا حق رائے دہی ڈاک کے ذریعے استعمال کریں گے۔

انتظامیہ کی جانب سے کیے جانے والے اقدامات کا مقصد ووٹنگ ٹرن آؤٹ بڑھانا اور اس بات کو یقینی بنانا ہے کہ امریکا کا ہر شہری اپنا حق رائے دہی ضرور استعمال کرے۔

Comments

comments

یہ بھی پڑھیں