ابوظہبی : ورلڈ چیمپیئنز ویسٹ انڈیز کو کلین سوئپ کرنے کیلئے تیسرا اور آخری ٹی ٹوئنٹی میچ آج ابوظہبی میں کھیلا جائے گا۔ پاکستان کو سیریز میں 0-2 کی برتری حاصل ہے۔
تفصیلات کے مطابق ٹی ٹوئنٹی سیریز پاکستان کے نام ہوگئی اب ویسٹ انڈیز کا وائٹ واش سے بچنے کا امتحان ہوگا۔ دبئی میں ورلڈ چیمپئنز کی دال نہ گل سکی۔ اب مہمان ٹیم ابو ظہبی میں قسمت آزمائے گی۔
پہلے ٹی ٹوئنٹی میں پاکستان نے ہدف کا کامیابی سے تعاقب کیا۔ دوسرے ٹی ٹوئنٹی میں ویسٹ انڈیز ٹاس جیت کر بھی میچ ہار گیا اور شاہین سیریز لے اڑے۔
ٹی ٹوئنٹی سیریز میں کلین سوئپ کرنے کے بعد ساتویں نمبر پر موجود پاکستان کے ریٹنگ پوائنٹس میں بہتری آئے گی۔ پاکستان نے پہلے ٹی ٹوئنٹی میچ میں ویسٹ انڈیز کو 9 وکٹوں اور دوسرے میچ میں 16 رنز سے شکست دی تھی۔
دبئی میں دونوں ٹی ٹوئنٹی میچز میں میدان کھچا کھچ بھرے رہے۔ دوسرے میچ میں عمر اکمل کا جشن کا انداز بھی کافی مشہور رہا۔۔ ورلڈ چیمپئنز کے پاس اب ہارنے کے لئے کچھ بھی نہیں ہوگا۔
تیسرے میچ میں قومی ٹیم میں کسی تبدیلی کا امکان نہیں جب کہ مہمان ٹیم کے کپتان کارلوس بریتھ ویٹ اپنی ٹیم کی کارکردگی سے خوش نہیں اورامکان ظاہر کیا جارہا ہے کہ تیسرے میچ کے لئے ٹیم میں ایک سے 2 تبدیلیاں کی جاسکتی ہیں۔ ادھر سرفراز کی قیادت میں ٹیم تو سرفراز ہوگئی اب شاہینوں نے وائٹ واش پر نظریں جمالیں ہیں۔
