ابوظبی: متحدہ عرب امارات کی ریاست ابوظبی میں دو مختلف حادثات میں اسکول بسیں حادثے کا شکار ہوگئیں، جس کے نتیجے میں 9 طالب علم زخمی ہوگئے۔
تفصیلات کے مطابق ابوظبی میں دو مختلف حادثات کے نتیجے میں 9 طالب علم زخمی ہوگئے جنہیں طبی امداد کے لیے مقامی اسپتالوں میں منتقل کردیا گیا۔
رپورٹ کے مطابق پہلا حادثہ الریم آئی لینڈ کے قریب پیش آیا جہاں اسکول بس تیز رفتار کار سے ٹکرائی جس کے نتیجے میں 6 بچے زخمی ہوئے۔
دوسرا حادثہ الرہا ساحل روڈ پر پیش آیا جہاں کار اور اسکول بس میں تصادم ہوا جس کے نتیجے میں تین اماراتی بچوں سمیت 2 خواتین زخمی ہوئیں۔
بریگیڈیئر جنرل سہیل الخلیلی نے گزشتہ روز اسپتال کا دورہ کیا اور اسپتال انتظامیہ کو بچوں کی جلد صحت یابی کی ہدایت کی۔
مزید پڑھیں: متحدہ عرب امارات، خوفناک ٹریفک حادثے میں 4 بچوں کی ماں جاں بحق
الخلیلی کا کہنا تھا کہ ابوظبی پولیس کو ہدایت کی کہ وہ حادثات کی روک تھام کے لیے آگاہی مہم چلائیں تاکہ حادثات کی روک تھام میں مدد مل سکے۔
ان کا کہنا تھا کہ شہری گاڑی چلاتے ہوئے قانون پر عملدرآمد یقینی بنائیں اور ڈرائیونگ موبائل فون کا استعمال نہ کریں، اسپیڈ لمٹ کا بھی خیال رکھا جائے۔
واضح رہے کہ متحدہ عرب امارات میں حادثات میں اضافہ ہوا ہے، چند روز قبل بھی راس الخیمہ میں خوفناک تصادم میں تین بچے اور خاتون جاں بحق ہوگئی تھیں۔
اس سے قبل دبئی میں سیاحوں کی بس کو خطرناک حادثہ پیش آیا تھا جس کے تنیجے میں 17 سیاح ہلاک ہوگئے تھے جن میں دو پاکستانی بھی شامل تھے۔
