اسلام آباد: انسداددہشت گردی عدالت کے جج ابوالحسنات ذوالقرنین پر مِس کنڈکٹ کا الزام عائد کیا گیا ہے۔
تفصیلات کے مطابق اسلام آباد ہائی کورٹ نے انسداد دہشت گردی عدالت اسلام آباد کے جج ابوالحسنات محمد ذوالقرنین پر مِس کنڈکٹ کے الزامات کا جائزہ لینے کے لیے ایڈمنسٹریٹیو کمیٹی کو معاملہ انتظامی سائیڈ پر دیکھنے کیلئے نوٹ لکھ دیا ہے۔
نوٹ اسلام آباد ہائی کورٹ کے جسٹس گل حسن اور نگزیب اور جسٹس ارباب محمد طاہر نے لکھا، دونوں نے دہشت گردی کے مقدمے میں ملزم عامر مغل کی درخواست ضمانت منظوری کا تحریری فیصلہ جاری کیا۔
فیصلے میں کہا گیا کہ عامر مغل اور ان کے وکلا 6 فروری کو درخواست ضمانت پر عدالت میں پیش ہوئے، عدالت نے عبوری ضمانت میں توسیع کرتے ہوئے 13 فروری کی تاریخ دی، وکلا کے مطابق انہیں بعد میں معلوم ہوا کہ ان کی درخواست ضمانت مسترد کر دی گئی۔
اسلام آباد ہائیکورٹ نے فیصلے میں کہا کہ مقدمے کے تفتیشی افسر نے درخواست گزار کے وکلا کے مؤقف کی تصدیق کی جبکہ درخواست گزار کے وکلا نے جج ابوالحسنات ذوالقرنین پر مِس کنڈکٹ کا الزام لگایا۔
عدالت نے ریمارکس دیے کہ ایڈمنسٹریٹیو کمیٹی کو معاملہ انتظامی سائیڈ پر دیکھنے کے لیے نوٹ لکھ رہے ہیں تاہم جج کے کنڈکٹ سے متعلق کسی قسم کی آبزرویشن دینے سے گریز کر رہے ہیں، غیر معمولی نوعیت کا کیس ہونے پر پی ٹی آئی رہنما عامر مغل کی ضمانت منظور کی جاتی ہے۔
