کراچی : احتساب عدالت نے مراد علی شاہ کیخلاف نامکمل ریفرنس نیب کو واپس کردیا اور تمام اعتراضات دور کر کے ریکارڈ دوبارہ جمع کرانے کی ہدایت کردی۔
تفصیلات کے مطابق جعلی اکاؤنٹس کیس میں وزیراعلیٰ سندھ مراد علی شاہ کیخلاف نامکمل ریفرنس دائر ہونے کا انکشاف سامنے آیا ، جس کے بعد احتساب عدالت نے مراد علی شاہ کیخلاف نامکمل ریفرنس نیب کوواپس کردیا۔
وزیراعلیٰ مراد علی شاہ کیخلاف نیب ریفرنس پر اعتراضات عائد کردیے گئے ، احتساب عدالت نمبر 3نے ریفرنس میں صفحات کی ترتیب اورریکارڈکی بائنڈنگ پراعتراضات عائد کئے اور تمام اعتراضات دور کر کے ریکارڈ دوبارہ جمع کرانے کی ہدایت کردی۔
خیال رہے مراد علی شاہ کیخلاف توانائی منصوبوں میں اختیارات کےغلط استعمال کا ریفرنس ہے، جس میں کہا گیا ہے کہ وزیراعلیٰ سندھ نے من پسند کمپنی کو منصوبوں میں نوازا اور سندھ میں توانائی منصوبوں میں خلاف ضابطہ فنڈزجاری کئے گئے۔
نیب ریفرنس میں کہا گیا ہے کہ نوری آباد پاور کمپنی کے منصوبے اور سندھ ٹرانسمیشن اینڈڈسپیچ کمپنی منصوبےمیں اربوں کی ہیر پھیر کی گئی، ریفرنس میں مرادعلی شاہ، عبد الغنی مجید سمیت 17 ملزمان کو ملزم نامزد کیا گیا ہے۔
