کراچی: جامعہ کراچی میں نئے تعلیمی سال کے پہلے دن انجمن اساتذہ نے انتظامیہ کے رویے کے خلاف کلاسز کا بائیکاٹ کردیا۔
تفصیلات کے مطابق جامعہ کراچی میں نئے تعلیمی سال کے پہلے دن ہی اساتذہ نے ہڑتال کردی، نئے طلبہ کا جامعہ کراچی میں تدریس کا پہلا دن، اساتذہ نے کلاس ہی نہیں لی۔
انجمن اساتذہ کا کہنا ہے کہ سندھ حکومت کی طرف سالانہ 400 ملین کی گرانٹ ناکافی ہے، جامعہ کراچی کوطلبہ کے تناسب سے گرانٹ فراہم کی جائے۔
انجمن اساتذہ کے مطابق انتظامیہ اساتذہ کے مسائل کے حل میں ٹال مٹول سے کام لے رہی ہیں، سیکڑوں اساتذہ کے ایوننگ پروگرام بلز التوا کا شکارہیں۔
انجمن اساتذہ کا کہنا ہے کہ پی ایچ ڈی الاؤنس کوتنخواہ کا حصہ بنایا جائے۔
یاد رہے کہ دو روز قبل ڈاکٹر انیلا امبرملک کی زیرصدارت انجمن اساتذہ کے لائحہ عمل اور جنرل باڈی کی تاریخ طے کرنے کے لیے مجلس عاملہ اجلاس ہوا تھا۔
انجمن اساتذہ جامعہ کراچی نے شعبہ جات میں اساتذہ کی بھرتیوں کے اشتہار نہ دینے کے خلاف 21 جنوری سے 24 جنوری تک صبح وشام کی کلاسز کے مکمل بائیکاٹ کا اعلان کیا تھا۔
