حیدر آباد: احتساب عدالت حیدر آباد نے محکمہ فاریسٹ بدین میں 4 کروڑ روپے کی کرپشن کرنے والے افسران کو سزائیں سنا دیں۔
تفصیلات کے مطابق آج حیدر آباد کی احتساب عدالت میں محکمہ فاریسٹ بدین میں 4 کروڑ روپے کی کرپشن کیس کی سماعت ہوئی، جرم ثابت ہونے پر 2 سابق افسران سمیت 6 مجرموں کو قید اور جرمانے کی سزائیں سنائی گئیں۔
سابق ڈسٹرکٹ فاریسٹ آفیسر (ڈی ایف او) انور بلوچ کو جرم ثابت ہونے پر 5 سال قید اور 50 لاکھ روپے جرمانہ کیا گیا ہے، نصر اللہ کو بھی 5 سال قید اور 50 لاکھ جرمانے کی سزا کا حکم سنایا گیا۔
احتساب عدالت نے محکمہ فاریسٹ کے سابق ڈی ایف او ارشاد جیسر کو ایک سال قید اور 50 لاکھ روپے جرمانے کی سزا سنائی، ارسلان شیخ کو 2 سال قید اور 20 لاکھ روپے جرمانے کی سزا دی گئی۔
احتساب عدالت کی جانب سے محکمہ فاریسٹ کے آر ایف او سہیل شیخ کو 5 سال قید اور 50 لاکھ روپے جرمانے، وقاص شیخ کو بھی پانچ سال قید اور پچاس لاکھ جرمانے کی سزائیں سنائی گئیں۔
3 مجرمان وقاص شیخ، ارسلان شیخ اور سہیل شیخ آپس میں بھائی ہیں، جب کہ عدالت نے جرم ثابت نہ ہونے پر 6 ملزمان کو کیس سے بری کر دیا، ایک ملزم غلام حیدر دوران ٹرائل انتقال کر چکا ہے۔
سزا یافتہ مجرمان انور بلوچ اور ان کا بیٹا نصراللہ فیصلے کے وقت عدالت میں موجود نہیں تھے، عدالت نے مجرمان انور بلوچ اور نصر اللہ کے وارنٹ گرفتاری بھی جاری کر دیے۔
کرپشن کیس کا فیصلہ احتساب عدالت کے جج انعام علی کلہوڑو نے سنایا۔
