The news is by your side.

Advertisement

سعودی عرب: گداگری میں ملوث افراد کے خلاف سخت سزاؤں کا اعلان

ریاض: سعودی حکام نے گداگری میں ملوث افراد اور گروہوں کے خلاف سخت ہدایات جاری کردیں، گداگری میں ملوث مقامی افراد کو جرمانے و قید کی سزا ہوگی جبکہ غیر ملکیوں کو ڈی پورٹ کردیا جائے گا۔

سعودی ویب سائٹ کے مطابق ادارہ پبلک پراسیکیوشن کا کہنا ہے کہ کسی بھی قسم کی گداگری میں ملوث ایک یا ایک سے زائد افراد، گداگری کی معاونت کرنے یا ناجائز طریقے سے رقم جمع کرنا خلاف قانون ہے۔

گداگری میں ملوث افراد کے لیے 6 ماہ قید اور 50 ہزار ریال جرمانے کی سزا مقرر ہے، غیر ملکی ہونے کی صورت میں سزا مکمل کرنے کے بعد اسے مملکت سے ڈی پورٹ کر کے ہمیشہ کے لیے بلیک لسٹ کر دیا جائے گا۔

پراسیکیوشن کے ٹویٹر پر اس حوالے سے مزید کہا گیا ہے کہ کوئی بھی ایسا فرد جو براہ راست یا بالواسطہ گداگری میں ملوث ہو، اس کی ترغیب دے یا معاونت کرے، اسے گرفتار کر کے اس کے خلاف مقدمہ دائر کیا جائے گا۔ ایسے افراد کو 6 ماہ قید اور 50 ہزار ریال جرمانے کی سزا دی جائے گی۔

گداگری کا نیٹ ورک چلانے والے یا کسی بھی طور پر اس مکروہ پیشے سے وابستگی رکھنے والے خواہ وہ براہ راست ہو یا بالواسطہ انہیں 1 برس قید اور 1 لاکھ ریال جرمانے کا سامنا کرنا ہوگا۔

غیر ملکی ہونے کی صورت میں ایسے افراد کو مملکت سے بے دخل کر کے انہیں ہمیشہ کے لیے بلیک لسٹ کر دیا جائے گا، ایسے افراد جنہیں بلیک لسٹ کیا جائے گا وہ صرف عمرے یا حج ویزے پر ہی مملکت آسکیں گے۔

Comments

یہ بھی پڑھیں