اسلام آباد: آئی جی اسلام آباد سید علی ناصر رضوی کے احکامات پر ٹریفک انفورسمنٹ مہم میں ٹریفک پولیس نے گزشتہ ہفتے کی کارکردگی رپورٹ جاری کر دی۔
ترجمان اسلام آباد ٹریفک پولیس نے بتایا کہ ٹریفک انفورسمنٹ مہم کے دوران قوانین کی خلاف ورزیوں پر ایک ہفتے میں 792 گاڑیوں اور موٹرسائیکلوں کے خلاف قانونی کارروائیاں کی گئیں۔
یہ بھی پڑھیں: گاڑی اور موٹر سائیکل مالکان ہوشیار! 5 نئے سخت ترین ٹریفک قوانین نافذ
اعداد و شمار کے مطابق دوران ڈرائیونگ ٹریفک قوانین کی خلاف ورزی کرنے والے 1 ہزار 779 موٹرسائیکل اور 1 ہزار 532 گاڑیاں تھانے منتقل کی گئیں۔
بتایا گیا کہ لین خلاف ورزی پر 469، بغیر لائسنس کے 111، غیر قانونی پارکنگ 1816، مخالف سمت 775 ڈرائیورز، بغیر نمبر پلیٹ 1051، سگنل وائیلشن 1103 اور بغیر ہیلمٹ پر 1302 کارروائیاں کی گئی۔
سی ٹی او اسلام آباد کیپٹن (ر) سید ذیشان حیدر نے خصوصی مہم کے تحت بلا تفریق کاروائیاں جاری رکھنے کی ہدایت کرتے ہوئے کہا کہ قوانین کی خلاف ورزی پر زیرو ٹالرینس پالیسی اپنائی جا رہی ہے۔
کیپٹن (ر) سید ذیشان حیدر نے کہا کہ ٹریفک اہلکار یقینی بنائیں کہ کوئی بغیر لائسنس کے ڈرائیونگ نہ کر سکے۔
انہوں نے شہریوں سے ٹریفک اہلکاروں کے ساتھ تعاون کی اپیل کی۔
مئی میں اسلام آباد ٹریفک پولیس نے ایک ہفتے کے دوران 1 ہزار 52 گاڑیاں قوانین کی خلاف ورزی پر بند کی تھیں جبکہ 740 موٹرسائیکل اور 312 گاڑیوں کے چالان کیے تھے۔
کالے شیشے استعمال کرنے والی 98 گاڑیوں کے خلاف کارروائیاں کی گئیں جبکہ دوران ڈرائیونگ موبائل استعمال کرنے پر 114 ڈرائیورز کو جرمانہ عائد کیا گیا تھا۔
اسی طرح غیر قانونی پارکنگ پر 3 ہزار 315، سیٹ بیلٹ خلاف ورزی پر 384 گاڑیوں اور دوران ڈرائیونگ ہیلمنٹ نہ پہننے پر 634 موٹر سائیکل کو ٹکٹس جاری کیے گئے تھے۔
