پنجاب اسمبلی کے ڈپٹی اسپیکر دوست محمد مزاری کے خلاف تحریک عدم اعتماد پر کارروائی آئندہ ہفتے ہونے کا امکان ہے۔
اے آر وائی نیوز کے مطابق پنجاب اسمبلی کے ڈپٹی اسپیکر دوست محمد مزاری کے خلاف تحریک عدم اعتماد پر کارروائی آئندہ ہفتے ہونے کا امکان ہے۔ ان کے خلاف پی ٹی آئی نے عدم اعتماد اپریل کے پہلے ہفتے میں جمع کرائی تھی۔
ذرائع نے اس حوالے سے اے آر وائی نیوز کو بتایا ہے کہ آئندہ ہفتے ڈپٹی اسپیکر کے خلاف تحریک عدم اعتماد پر ووٹنگ کیساتھ نئے اسپیکر کے انتخاب کا بھی امکان ہے۔
ذرائع کے مطابق پی ٹی آئی پنجاب اسمبلی کے لیے سبطین خان کا نام فائنل کرچکی ہے جب کہ ڈپٹی اسپیکر کیلیے 2 امیدواروں کے نام شارٹ لسٹ کرچکی ہے جن میں واثق قیوم اور تیمور مسعود شامل ہیں۔
واضح رہے کہ اس سے قبل تحریک انصاف کے رہنما سینٹر فیصل جاوید کا ایک بیان آیا تھا جس میں انہوں نے کہا تھا کہ پارٹی نے دوست مزاری کو ڈپٹی اسپیکر کے عہدے سے ہٹانے کا فیصلہ کیا ہے۔
یہ بھی پڑھیں: تحریک انصاف کا ڈپٹی اسپیکر پنجاب اسمبلی کو فارغ کرنے کا فیصلہ
فیصل جاوید کا کہنا تھا کہ ایسا لگتا ہے کہ دوست مزاری پی ڈی ایم فل بینچ کی سربراہی کرینگے اس لئے ہٹانے کا فیصلہ کیا ہے۔
