شوبز انڈسٹری کی اداکارہ اور کمرشل پائلٹ عمارہ چوہدری نے بتایا ہے کہ وہ کس کرکٹر سے شادی کرنا چاہیں گی۔
اداکارہ عمارہ چوہدری نے حال ہی میں نجی ٹی وی کے مزاحیہ پروگرام میں شرکت کی جہاں میزبان نے سوال کیا کہ اگر کسی کرکٹر کا رشتہ آجائے تو کس کو ہاں کہہ دیں گی؟
میزبان نے چار آپشن دیے جن میں بابر اعظم، نسیم شاہ، صائم ایوب اور اعظم خان کے نام شامل تھے۔
تاہم عمارہ چوہدری نے ان آپشنز کو چھوڑ کر شاہد آفریدی کا نام لیا اور کہا کہ اگر شاہد آفریدی کا رشتہ آجائے تو وہ ان سے شادی کرلیں گی۔
میزبان نے آپشنز میں دیے گئے نام پر اصرار کیا تو عمارہ نے کہا کہ بابر اعظم بھی اچھے کرکٹر ہیں۔
اس سے قبل انٹرویو میں میزبان نے پوچھا تھا کہ شوبز انڈسٹری میں آپ کا کرش کون ہے؟
عمارہ چوہدری کا کہنا تھا کہ ایک ہی تھا، ایک ہی ہے اور وہی رہے گا سلمان خان، پاکستان میں انہوں نے اداکار فہد مصطفیٰ کا نام لیا پھر کہنے لگیں کہ میں اکثر فہد بھائی بولنے لگ جاتی ہوں پھر کہتی ہوں کہ ابھی تو کرش بولا تھا۔
یہ پڑھیں: عمارہ چوہدری نے اپنے ’کرش‘ کا نام بتادیا
ان کا کہنا تھا کہ اگر ایک دن کے لیے کسی کی زندگی جینا ہو تو میں ایدھی صاحب کی زندگی جینا چاہوں گی، جب کراچی آئی تو چاہتی تھی کہ ان سے ملوں گی لیکن اس سے قبل ان کا انتقال ہوچکا تھا۔
اداکارہ نے کہا تھا کہ اگر سپر پاور دی جائے تو چاہوں گی کہ میں دوسروں کا دماغ پڑھ سکوں۔
میزبان نے پوچھا کہ پیار یا پیسہ؟ اداکارہ کا کہنا تھا کہ پیسہ کیونکہ پیار کسی کو نہیں ملتا اور آج کل کے دور میں پیار ہوتا بھی نہیں ہے۔
