شوبز انڈسٹری کی سینئر اداکارہ حنا خواجہ بیات کا کہنا ہے کہ ڈراموں میں ماں کا کردار کرلو تو اداکار آپا کہنا شروع کردیتے ہیں۔
سینئر اداکارہ حنا خواجہ بیات نے صبا فیصل کے ساتھ نجی ٹی وی کے شو میں شرکت کی اور سیٹ پر اداکاروں کی جانب سے ’آپا‘ کہے جانے پر اظہار خیال کیا۔
انہوں نے کہا کہ جس اداکار نے آپا کہا تھا اسے میری ساتھی اداکارہ نے کہا کہ حنا کا شناختی کارڈ یہاں ہے اپنا شناختی کارڈ دکھاؤ کہ تمہاری کتنی عمر ہے تو اس اداکار کے پسینے چھوٹ گئے تھے۔
حنا خواجہ نے کہا کہ اداکار نے کہا کہ غلطی سے آپا منہ سے نکل گیا میں عزت دے رہا تھا، ارے بھئی آپ جی لگادیں میں بھی اپنے سینئرز کو نام کے ساتھ جی لگا دیتی ہوں یہ اچھا ہے۔
انہوں نے کہا کہ میں اداکار سے کہتی ہوں کہ میں آپا کب سے ہوگئی، دراصل ہم نے ماں کا کردار کرلیا تو آپا ہوگئے اور وہ مزید چھوٹے ہوگئے وہ بڑے ہی نہیں ہورہے۔
اداکار نے کہا کہ ہمیں کیا سیٹ پر رشتے داری نبھانی ہے اگر میں کسی دفتر میں کام کررہی ہوں تو امی میری باس ہیں تو انہیں امی تو نہیں کہوں گی۔
حنا خواجہ نے کہا کہ میں گھر میں بھی بچوں کو تم کہہ کر نہیں مخاطب کرتی بلکہ انہیں آپ کہا جاتا ہے، کیریکٹر میں تم بول سکتے ہیں کیونکہ ہم اپنے کردار میں ڈھل جاتے ہیں۔
