تیلگو فلم انڈسٹری کے سپر اسٹار رام چرن اور ان کی اہلیہ اپاسنا کونی ڈیلا کے ہاں شادی کے 11 سال بعد بیٹی کی پیدائش ہوئی ہے۔
اداکار رام چرن کے ہاں بیٹی کی پیدائش 20 جون بروز منگل کی صبح بھارتی حیدرآباد کے ایک اسپتال میں ہوئی جس کا اعلان اسپتال انتظامیہ کی جانب سے کیا گیا۔
ڈاکٹرز کے مطابق اداکار کی نومولود بالکل صحت مند ہیں جب کہ ان کی اہلیہ اپاسنا کی حالت بھی بہتر ہے۔
دوسری جانب اداکار آسکر ایوارڈ یافتہ گانے ’ناٹو ناٹو‘ کے گلوکار کالا بھیروا نے رام چرن کی بیٹی کے لیے خصوصی دھن تخلیق کی ہے، اس خصوصی دھن کو اداکار نے انسٹاگرام پر اپنے مداحوں کے ساتھ شیئر کیا ہے۔
View this post on Instagram
رام چرن نے اس دھن کو شیئر کرتے ہوئے لکھا کہ ’ ہمارے انمول بچے کے لیے یہ معنی خیز دھن تحلیق کرنے کے لیے کالا بھیروا کا شکریہ، یہ دھن دنیا بھر کے لاکھوں بچوں کے لیے خوشی اور مسرت لائے گی‘۔
واضح رہے کہ رام چرن ایک مشہور بھارتی فلمی اداکار ہیں جبکہ اپاسنا ایک کاروباری شخصیت اور اپولو فاؤنڈیشن کی وائس چیئرمین ہیں۔
دونوں نے 2012 میں محبت کی شادی کی تھی، وہ اپنے کالج کے دنوں میں مشترکہ دوستوں کے ذریعے ایک دوسرے سے ملے اور دوست بن گئے، بعدازاں ان کی دوستی محبت میں بدل گئی اور انہوں نے ڈیٹنگ شروع کی۔