ممبئی: بالی ووڈ کے سینئر اداکار سنیل شیٹی نے صاحبزادی و اداکارہ اتھیا شیٹی کی کرکٹر کے ایل راہول سے شادی کی خبروں پر حیران کُن ردعمل دے دیا۔
بھارتی میڈیا رپورٹس میں گزشتہ دنوں دعویٰ کیا گیا تھا کہ کرکٹر کے ایل راہول اور اتھیا شیٹی کی شادی کی تاریخ سامنے آگئی ہیں اور دونوں آئندہ برس جنوری کے آخری ہفتے میں شادی کے بندھن میں بندھ جائیں گے۔
کرکٹر کے قریبی دوستوں نے بھی بھارتی میڈیا کو بتایا تھا کہ اتھیا اور راہول کی شادی کی تقریبات 21 سے 23 جنوری میں منعقد ہوگی۔
View this post on Instagram
یہ بھی دعویٰ کیا گیا تھا کہ دونوں سیلبرٹیز کی شادی کی تقریب سنیل شیٹی کے کھنڈالا میں واقع بنگلے پر منعقد کی جائے گی جس میں قریبی عزیز اور دوست و احباب شرکت کریں گے۔
رپورٹ میں بتایا گیا تھا کہ کے ایل راہول اور اتھیا شیٹی کی ساؤتھ انڈین شادی کی تقریبات میں ہلدی، مہندی، سنگیت سمیت دیگر رسمیں ہوں گی اور دلہا دلہن کے لباس کو بھی حتمی شکل دے دی گئی ہے۔
تاہم اب بھارتی میڈیا کا کہنا ہے کہ جب سنیل شیٹی سے اتھیا کی شادی سے متعلق پوچھا گیا تو ان کے جواب نے سب کو حیران کردیا۔
سنیل شیٹی نے دونوں کی شادی کی خبروں کو رد کرتے ہوئے کہا کہ ’آپ کو اگر شادی کی تاریخیں مل جائیں تو مجھے بھی مطلع کریں تاکہ میں بھی شادی میں شریک ہوجاؤں۔‘
View this post on Instagram
واضح رہے کہ کے ایل راہول اور اتھیا شیٹی کے افیئر کی خبریں بھی بھارتی میڈیا کی زینت بنی تھیں اور اب دونوں کی شادی سے متعلق بھی میڈیا رپورٹس میں متعدد خبریں سامنے آرہی ہیں۔
اتھیا شیٹھی نے آخری بار 2019 میں ’موتی چُور چھکن چُور‘ میں اداکاری کے جوہر دکھائے تھے جبکہ بیٹر کے ایل راہول ٹیم کے نائب کپتان ہیں اور لیگ میں لکھنٔو سپر جائنٹس سے کھیلتے ہیں۔
