کراچی: پاکستانی ڈرامہ انڈسٹری کی معروف اداکارہ عائزہ خان نے ماضی کے خوبصورت دن کو یاد کرتے ہوئے تصویر شیئر کی جو سوشل میڈیا پر وائرل ہوگئی۔
تفصیلات کے مطابق اداکارہ عائزہ خان نے سماجی رابطے کی ویب سائٹ انسٹاگرام پر ماضی کی یادگار تصویر شیئر کی جو ان کی گریجویشن مکمل ہونے کی تقریب کی ہے، تصویر کو مداحوں کی جانب سے خوب سراہا جارہا ہے۔
تصویر میں عائزہ خان نے سیاہ رنگ کا گریجویشن گاؤن اور کیپ پہنا ہوا ہے اور وہ خوش گوار موڈ میں دکھائی دے رہی ہیں۔
اداکارہ کی تصویر میں ان کے ہمراہ والدین بھی موجود ہیں جو بیٹی کے گریجویشن مکمل ہونے پر بے حد خوش دکھائی دے رہے ہیں۔
تصویر کے کیپشن میں عائزہ خان نے لکھا کہ ’تھرو بیک ٹو گریجویشن ڈے۔‘ عائزہ کی اس تصویر کو 2 لاکھ سے زائد صارفین نے پسند کیا اور متعدد صارفین نے اس پر تبصرہ بھی کیا۔
واضح رہے کہ اس سے قبل عائزہ خان نے انسٹاگرام پر اپنی بیٹی حورین اور بیٹے ریان تیمور کے لیے ایک جذباتی پیغام شیئر کیا تھا۔
تصویر کے کیپشن میں اُنہوں نے لکھا تھا کہ اُن کے لیے یہ بیان کرنا ناممکن ہے کہ وہ اپنے ان دونوں بچوں سے کس قدر محبت کرتی ہیں اور اِن کے بہتر مستقبل کے لیے کتنی تیار ہیں۔
خیال رہے کہ عائزہ خان نے اے آر وائی ڈیجیٹل کے ڈرامے ’تھوڑا سا حق‘ میں مرکزی کردار ادا کیا تھا، ڈرامے میں ان کے ہمراہ عمران عباس موجود تھے، مداحوں کی جانب سے عائزہ کی اداکاری کو خوب سراہا گیا تھا۔
