کراچی : پاکستان فلم اندسٹری کی معروف اداکارہ ریشم نے کہا ہے کہ دشمن بھی مانتے ہیں مریم نواز پنجاب میں کام کررہی ہیں۔
اے آر وائی نیوز کے پروگرام ہر لمحہ پرجوش میں خصوصی گفتگو کرتے ہوئے ان کا کہنا تھا کہ ن لیگ پنجاب میں بھرپور کام کررہی ہے تاہم پنجاب کے سابق وزیر اعلیٰ عثمان بزدار کی صوبے میں پرفارمنس زیرو تھی۔
وزیر اعلیٰ پنجاب کے حوالے سے بات کرتے ہوئے انہوں نے بتایا کہ گزشتہ دنوں ایک کلچر پروگرام کی تقریب میں مریم نواز سے پہلی بار بالمشافہ ملاقات ہوئی تھی۔
اداکارہ ریشم نے بتایا کہ میں ان کے اخلاق سے بہت زیادہ متاثر ہوئی، اس وقت مجھے ایسا لگ رہا تھا جیسے مریم نواز سے پہلے بھی ملاقات ہوچکی ہے۔
ریشم نے کہا کہ مریم نواز نے مجھے جو پیار اور عزت بخشی وہ ہمیشہ یاد رہے گی، مریم نواز نے میری لنگر خانے کی ویڈیوز بھی دیکھیں اور مجھ سے دعاؤں میں یاد رکھنے کا کہا۔
شادی سے متعلق ایک سوال کے جواب میں اداکارہ ریشم نے دوٹوک الفاظ میں کہا کہ شادی اس سے کروں گی جو میری ضروریات پوری کرسکے، انہوں نے بتایا کہ اپنی پہلی کمائی سے میں نے عمرے کی سعادت حاصل کی تھی۔
واضح رہے کہ اداکارہ ریشم نے اپنے سوشل میڈیا اکاؤنٹ انسٹاگرام پر پنجاب کلچرل ڈے پر لی گئی وزیرِ اعلیٰ پنجاب مریم نواز کے ہمراہ تصاویر شیئر کی تھیں۔
ان کا کہنا تھا کہ وزیرِ اعلیٰ پنجاب سے ملاقات کے بعد بھی ان کی شخصیت کی سحر میں جکڑا ہوا محسوس کر رہی ہوں۔
اپنے پیغام میں ریشم نے مریم نواز شریف کی تعریف کرتے ہوئے کہا ہے کہ ایک عورت ہو کر مردوں پر سبقت لے جانے والی اس عورت کے لیے میرے دل سے صرف دعائیں ہی نکلتی ہیں، جیو مریم۔
