The news is by your side.

Advertisement

ہالی وڈ کی سیاہ فام حسینہ ڈوروتھی ڈینڈرج کی کہانی

یہ بات آپ کے لیے تعجب خیز ہوسکتی ہے کہ ایک سیاہ فام ہالی وڈ میں اپنے روپ سروپ اور دل کشی کے لیے مشہور رہی ہیں۔ یہ ڈوروتھی ڈینڈرج ہیں اور ان کی دل کشی اور صلاحیتوں کا چرچا اس زمانے میں ہوا جب فلمی صنعت میں نسلی امتیاز، تعصّب اور صنفی تفریق کا بھی زور تھا۔

آئیے ڈوروتھی ڈینڈرج کی زندگی کے اوراق الٹتے ہیں۔

وہ 1922ء میں پیدا ہوئیں۔ ان کا وطن امریکا تھا۔ ڈوروتھی کی پیدائش سے قبل ہی ان کے والدین میں‌ علیحدگی ہوچکی تھی۔ ڈینڈرج کی ماں بھی اداکارہ تھیں اور ریڈیو ان کی پہچان تھا۔ ان کی دونوں بیٹیاں تھیں‌ جو لڑکپن ہی سے فنونِ لطیفہ میں دل چسپی لینے لگیں۔ انھوں نے اداکاری، رقص اور گائیکی کو اپنا شوق اور پیشہ بنایا۔

ڈوروتھی ڈینڈرج نے اداکاری ہی نہیں کی، گلوکاری اور رقص میں بھی مہارت حاصل کی اور اپنی صلاحیتوں کو منوایا۔

یہ وہ زمانہ جب امریکا میں سیاہ فام بدترین نسلی امتیاز اور تعصب جھیل رہے تھے۔ انھیں حقارت اور نفرت ہی نہیں‌ تشدد کا سامنا بھی تھا۔ وہ کئی سہولیات اور مراعات سے صرف اس لیے محروم تھے کہ وہ سیاہ فام غلاموں کی اولاد ہیں۔

اس زمانے میں ہالی وڈ میں بھی سیاہ فاموں کو چھوٹے اور غیر اہم کرداروں کے قابل سمجھا جاتا تھا، انھیں معمولی نوکری ملتی اور کم تر درجے کا ملازم تصوّر کیا جاتا۔ ان حالات میں ڈینڈرج کا نام ہالی وڈ کے افق پر ایسا چمکا کہ دنیا بھر میں ان کی خوب صورتی اور فن کا چرچا ہونے لگا۔

کہا جاتا ہے کہ اپنے دور کی خوب صورت ترین اور دل کش اداکارہ مارلن منرو سے پہلے ڈوروتھی ڈینڈرج ہی تھیں جنھیں پُرکشش مانا جاتا تھا۔ انھیں مشہور ترین ‘لائف’ میگزین کے سرورق پر جگہ دی گئی۔ وہ پہلی سیاہ فام اداکارہ تھیں جنھیں میگزین نے ٹائٹل پر سجایا۔

ڈینڈرج نے 40 اور 50 کی دہائی میں ہالی وڈ کی فلموں میں معمولی کردار نبھائے اور شائقین کو متوجہ کرنے میں‌ کام یاب رہیں۔ 1950ء کے آغاز پر ڈینڈرج نے نائٹ کلبز میں گلوکاری کا شوق پورا کیا اور خوب نام کمایا۔ اسی عرصے میں فلم ‘کارمین جونز’ میں انھیں گلوکارہ کا مرکزی رول آفر ہوا اور یہ فلم کام یاب رہی۔ اس فلم نے آسکر کی ریس میں قدم رکھا تو یہ سیاہ فام بہترین اداکارہ کے زمرے میں نام زد ہوئیں۔ یوں ان کا خوب چرچا ہوا۔

‘آئی لینڈ ان دی سن’ اور ‘پورگی اینڈ بیس’ وہ فلمیں‌ تھیں‌ جنھیں‌ سنیما بینوں نے بہت پسند کیا اور ڈینڈرج کی اداکاری سے متاثر ہوئے۔

ہالی وڈ کی اس سیاہ فام حسینہ نے 1965ء میں یہ دنیا ہمیشہ کے لیے چھوڑ دی۔ موت کے وقت ان کی عمر محض 42 سال تھی۔ ڈوروتھی ڈینڈرج کی موت پر ہالی وڈ میں باقاعدہ سوگ کا سماں تھا۔

Comments

یہ بھی پڑھیں