جگن ناتھ آزاد کو ادبی دنیا ایک خوب صورت شاعر اور نثر نگار کے ساتھ ماہرِ تعلیم کی حیثیت سے جانتی ہے۔ ان سے متعلق دو شگفتہ واقعات آپ کے ذوقِ مطالعہ کی نذر ہیں۔
ایک مرتبہ جگن ناتھ آزاد اٹلانٹا گئے جہاں ایک جاننے والے نے انھیں اپنے گھر دعوت پر بلالیا۔
میزبان نے گپ شپ کے دوران ان کی طرف چائے بڑھانے سے پہلے پوچھا کہ آزاد صاحب چینی کتنی لیں گے؟
انھوں نے جواب دیا: ’’اپنے گھر تو ایک ہی چمچ لیتا ہوں، لیکن باہر چائے پینے پر دو، تین چمچ سے کم چینی نہیں لیتا۔‘‘
یہ سن کر میزبان نے چائے کی پیالی میں ایک چمچ چینی ڈالی اور ان کی طرف بڑھاتے ہوئے ظرافت سے کہا:
’’آزاد صاحب! اسے اپنا ہی گھر سمجھیے۔‘‘
اسی طرح یہ واقعہ بھی ادبی دنیا میں بہت مشہور ہے کہ اٹلانٹا ہی میں جگن ناتھ آزاد، محسن بھوپالی اور حمایت علی شاعر ایک روز اسٹون فائونڈیشن دیکھنے نکلے، اور جب حمایت علی شاعر وہاں کی سیر کے وہ لمحات کیمرے میں قید کرنے لگے تو کچھ سوچ کر اپنے ساتھیوں سے بولے۔
کیمرہ تصویر تو لے لے گا، لیکن ہے ذرا پرانا۔
آزاد نے اس پر برجستہ کہا:
’’ہمیں کون سا خریدنا ہے۔‘‘
