کراچی : ایڈمنسٹریٹر کراچی ڈاکٹرسیف الرحمان کی ہدایت پر چہر بھر کے فٹ پاتھوں کی تعمیر و مرمت کے کام کا آغاز کردیا گیا ہے۔
ایڈمنسٹریٹر کراچی نے گورنر سندھ کے احکامات پر شہر کی خوبصورتی کیلئے کام شروع کردیا، کراچی کی تمام مرکزی شاہراہوں پر شجرکاری کا آغاز بھی کردیا گیا ہے۔
اس حوالے سے ایڈمنسٹریٹر کراچی ڈاکٹرسیف الرحمان کا کہنا ہے کہ شہر کی مختلف شاہراہوں پر ایک ہزار کے قریب پودے لگائے جاچکے ہیں۔
غیرقانونی پارکنگ فیس وصول کرنے والے گرفتار
علاوہ ازیں ایڈمنسٹریٹرکراچی کی ہدایت پر ڈائریکٹر چارجڈ پارکنگ نے یونیورسٹی روڈ پر کارروائی کی، اس دوران غیرقانونی چارجڈ پارکنگ میں ملوث افراد کو گرفتار کرلیا گیا۔
ذرائع کا کہنا ہے کہ غیرقانونی چارجڈ پارکنگ کی وصولی میں ملوث افراد کے ایم سی کو بدنام کر رہے تھے۔ متعلقہ افسران کے پہنچنے پر شرپسند عناصر روپوش ہوجاتے اور بعد میں غیرقانونی پارکنگ فیس وصول کرتے تھے۔
ذرائع کے مطابق تھانہ نیو ٹاؤن میں غیرقانونی چارجڈ پارکنگ کی وصولی کے خلاف درخواست جمع کرائی گئی تھی۔ تھانہ انچارج سے کہا گیا تھا کہ غیرقانونی پارکنگ فیس کی وصولی کے خلاف قانونی کارروائی کی جائے۔
ذرائع کا بتانا ہے کہ سوک سینٹر کے قریب آنے والے شہریوں سے خود ساختہ غیر قانونی پارکنگ فیس وصول کی جارہی تھی۔
ڈاکٹر سید سیف الرحمن کا کہنا ہے کہ جو پارکنگ سائٹس کے ایم سی نے بند کردی ہیں وہاں پارکنگ فیس وصول کرنے کی ہرگز اجازت نہیں دی جائے گی۔
