معروف گلوکار عدنان سمیع نے اپنے بیٹے اذان سمیع کو پہلی ڈراما سیریل ’عشقِ لا‘ میں بہترین اداکاری کرنے پر مبارکباد پیش کی ہے۔
گزشتہ دنوں اذان سمیع خان نے اپنے پہلے ڈرامہ سیریل ’عشقِ لا‘ کی کامیابی پر مداحوں کا شکریہ ادا کرنے کے لیے انسٹا گرام پر ایک طویل پوسٹ شیئر کی تھی جس میں انہوں نے اپنے پرستاروں، ساتھی اداکاروں اور پروڈیوسر کا تہہ دل سے شکریہ ادا کیا تھا۔
اذان سمیع نے اپنی اس پوسٹ میں کہا تھا کہ یہ اُن کا پہلا کردار تھا جسے وہ زندگی بھر یاد رکھیں گے کیونکہ اس کردار سے انہیں بہت کچھ سیکھنے کا موقع ملا اور اس موقع پر وہ اُن تمام لوگوں کے مقروض ہیں جنہوں نے اُن کے کیریئر کے ابتدائی مرحلے میں اُن کی مدد کی۔
View this post on Instagram
اس پوسٹ پر جہاں معروف اداکاراؤں یمنیٰ زیدی اور ماہرہ خان نے کمنٹس کرکے اذان سمیع کی حوصلہ افزائی کی وہیں بھارت میں مقیم اُن کے والد عدنان سمیع بھی خاموش نہ رہ سکے۔
عدنان سمیع نے بیٹے کی پوسٹ پر کمنٹ کرتے ہوئے لکھا کہ "شاباش بچے! مجھے تم پر فخر ہے” ساتھ ہی انہوں نے بیٹے کو دعا اور مستقبل کیلیے اہم مشورہ دیتے ہوئے کہا کہ "اللہ تعالیٰ آپ کو اونچی اُڑان دے لیکن ہمیشہ اپنے پاؤں زمین پر رکھنا”۔
عدنان سمیع نے برسوں سے دور بیٹے سے پیار بھرے جذبات کا اظہار کرتے ہوئے مزید لکھا کہ "بچے! میں تم سے محبت کرتا ہوں”۔
واضح رہے کہ اذان سمیع گلوکار عدنان سمیع اور زیبا بختیار کے بیٹے ہیں، زیبا بختیار اور عدنان سمیع نے 90 کی دہائی میں پاکستان کی سپرہٹ فلم سرگم میں ایک ساتھ کام کیا تھا اوراسی دوران دونوں کے درمیان محبت پروان چڑھی جس کے بعد وہ رشتہ ازدواج میں منسلک ہوئے تھے تاہم 1997 میں ذاتی وجوہات کی بنا پر دونوں نے طلاق کے ساتھ اپنے راستے جدا کرلیے تھے۔
