کراچی : گزشتہ روز سیالکوٹ میں ہونے والے اندوہناک واقعے پر پوری قوم سوگوار اور غم و غصے کا اظہار کر رہی ہے تو دوسری جانب پاکستان کی شوبز انڈسٹری سے وابستہ فنکاروں نے بھی اسے شرمناک قرار دیا ہے۔
اس حوالے سے پاکستان شوبز انڈسٹری کے سینئر اداکار عدنان صدیقی نے بھی اس افسوسناک واقعہ پر بےحد شرمندگی کا اظہار کرتے ہوئے کہا ہے کہ سیالکوٹ واقعے کے بعد مجھے بحیثیت پاکستانی شرم آتی ہے۔
عدنان صدیقی نے کہا کہ ہجوم کو ہنگامہ آرائی اور قانون کو ہاتھ میں لینے کی اجازت کسی صورت نہیں دی جانی چاہیے۔اداکار نے کہا کہ اللّہ تعالیٰ نے یہ حکم نہیں دیا کہ کسی بھی بےگناہ انسان کو اتنی بےدردی سے قتل کیا جائے۔
Ashamed as a Pakistani. Mob shouldn’t be let to run amok and take law in its hands. Allah would never want an innocent man killed with such brutality. We didn’t uphold his teachings with this abominable cruelty.
— Adnan Siddiqui (@adnanactor) December 5, 2021
سماجی رابطے کی ویب سائٹ ٹوئٹر پر اپنے پیغام میں اُنہوں نے مزید کہا کہ ہم نے اس گھناؤنے ظلم کے ساتھ دینِ اسلام کی تعلیمات کو برقرار نہیں رکھا۔
واضح رہے کہ حال ہی میں سیالکوٹ میں نجی فیکٹری کا سری لنکن منیجر فیکٹری ملازمین کے تشدد سے ہلاک ہوگیا تھا، مشتعل افراد نے لاش کو سڑک پر گھسیٹا اور آگ لگادی گئی تھی۔
مشتعل افراد کا دعویٰ ہے کہ مقتول نے مبینہ طور پر مذہبی جذبات مجروح کیے تھے، مشتعل افراد نے فیکٹری میں توڑ پھوڑ بھی کی۔
انسداد دہشت گردی کی عدالت نے سانحہ سیالکوٹ میں ملوث 26 ملزمان کو 15روزہ ریمانڈ پر پولیس کے حوالے کردیا ہے، پیشی کے بعد سخت سیکیورٹی میں ملزمان کو واپس سیالکوٹ روانہ کردیا گیا۔