پاکستانی شوبز انڈسٹری کے سینئر اداکار عدنان صدیقی نے سوشل میڈیا پر گردش کرتی اپنی وفات کی افواہوں پر خاموشی توڑ دی۔
عدنان صدیقی نے انسٹاگرام اکاؤنٹ سے ایک ویڈیو جاری کی جس میں وہ ایک یوٹیوب دیکھ رہے ہیں۔ ویڈیو میں خاتون کی جانب سے بریکنگ نیوز دی جا رہی ہے کہ آج صبح سینئر اداکار انتقال کر گئے۔
ویڈیو دیکھنے کے بعد وہ کہتے ہیں کہ میں بالکل ٹھیک ہوں اور آپ لوگوں کے سامنے ہوں، پتا نہیں کس نے یہ خبر پھیلا دی لیکن مداح پریشان نہ ہوں۔ انہوں نے کہا کہ موت برحق ہے لیکن ابھی کچھ دن باقی ہیں لہٰذا آپ سب خوش اور آباد رہیں۔
انہوں نے انسٹاگرام پوسٹ کے کیپشن میں لکھا کہ صحافت اور بریکنگ نیوز کے نام پر میرے انتقال کی افواہیں پھیلانے والے اگلی بار ایسی خبر بنانے سے پہلے مجھ سے رابطہ کریں میں خود آپ کے اسٹوڈیو پہنچ کر اس کی تصدیق کروں گا۔
انہوں نے مزید لکھا کہ آپ کی (غیر) ذمہ دار صحافت بے عیب نظر آنی چاہیے۔
ادھر سماجی رابطے کی ویب سائٹ ایکس پر بھی عدنان صدیقی نے انتقال کی افواہوں کو غلط قرار دیا۔
انہوں نے لکھا کہ ’اس سے پہلے کہ آپ سب تعزیت کا اظہار کریں میں بتا دوں کہ سوشل میڈیا پر گردش کرتی میرے انتقال کی خبریں غلط ہیں۔ میں زندہ اور خیریت سے ہوں، الحمدللہ۔‘
Before anyone of you start offering condolences here, am rubbishing the news of my demise that’s doing the rounds on social media. Yours truly is very much alive and kicking Alhamdulillah.
— Adnan Siddiqui (@adnanactor) September 9, 2023
