کابل: افغانستان میں شدت پسند تنظیم طالبان نے اپنی نوعیت کا بڑا حملہ کیا جس کے نتیجے میں 13 افغان سیکیورٹی فورسز کے اہلکار ہلاک اور متعدد زخمی ہوگئے۔
غیرملکی خبررساں ادارے کی رپورٹ کے مطابق طالبان نے افغان صوبے قندوس میں قائم سیکیورٹی چیک پوسٹوں کو نشانہ بنایا جس کے نتیجے میں تیرہ اہلکار ہلاک اور کئی زخمی ہوئے، زخمیوں میں چند کی حالت تشویش ناک ہے۔
صوبائی حکام نے حملے کی تصدیق کرتے ہوئے کہا ہے کہ مذکورہ شدت پسند کارروائی میں 8 پولیس اہلکار بھی زخمی ہوئے، جبکہ تین کو طالبان اغوا کرکے لے گئے۔ دہشت گروں نے چاروں طرف سے سیکیورٹی چیک پوسٹوں کو گھیرا کر نشانہ بنایا، اہلکاروں نے جوابی کارروائی بھی کی۔
ڈرون حملے کے بعد طالبان کا امریکی فوج پر حملہ
طالبان اور سیکورٹی اہلکاروں کے درمیان صبح تک مقابلہ جاری رہا، دہشت گردوں نے رات کی تاریکی کا فائدہ اٹھاتے ہوئے حملہ کیا۔ افغان فورسز کی جوابی کارروائی میں کئی طالبان کے مارے جانے کی بھی اطلاعات ہیں۔
خیال رہے کہ 11 جنوری کو افغانستان کے صوبے قندھار میں طالبان نے غیر ملکی افواج پر حملہ کر کے قافلے میں موجود تمام فوجیوں کو ہلاک کرنے کا دعویٰ کیا تھا۔ بعد ازاں نیٹو اور افغان فورسز نے حملے کی تصدیق کرتے ہوئے بتایا تھا کہ سڑک کنارے نصب بم کے ذریعے فوجی قافلے کو نشانہ بنایا گیا ہے، قافلے میں امریکی و اتحادی افواج کے اہلکار شامل تھے۔
