کابل: افغان طالبان کی حکومت کو تین سال مکمل ہو گئے ہیں، کابل میں تین سالہ جشن منایا گیا۔
تفصیلات کے مطابق افغان طالبان کے اقتدا ر کے تین سال مکمل ہونے پر کابل میں فوجی پریڈ کا انعقاد کیا گیا، پریڈ میں امریکی ساختہ بکتر بند گاڑیاں بھی شامل تھیں، جن پر طالبان کے سفید اور کالے جھنڈے لہرا رہے تھے۔
پریڈ گراؤنڈ کے اوپر ہیلی کاپٹروں اور لڑاکا طیاروں نے بھی پرواز کی، پریڈ میں مقامی طور پر تیار کردہ بم، فائٹر ایئر کرافٹ کے علاوہ سوویت دور کے ٹینکوں اور بگرام میں امریکی ایئر بیس میں موجود آرٹلری کی نمائش کی گئی۔
یہ تقریب سابق امریکی فوجی مرکز بگرام ایئر بیس میں منعقد ہوئی، جس میں چینی اور ایرانی سفارت کاروں نے بھی شرکت کی، یہ وہ مقام تھا جہاں کبھی طالبان جنگجوؤں کو قید رکھا جاتا تھا۔ وزیر اعظم محمد حسن آخوند نے شیڈول کے مطابق بگرام ایئربیس میں تقریب میں شرکت کرنی تھی، تاہم ان کی غیر موجودگی میں چیف آف اسٹاف نے ان کا پیغام پڑھا، جس میں مغربی قابضین کے خلاف طالبان حکام کی فتح کی تعریف کی گئی تھی۔
یاد رہے کہ افغان طالبان نے 15 اگست 2021 کو دارالحکومت کابل کا انتظام اس وقت سنبھالا جب امریکی حمایت یافتہ حکومت کا خاتمہ ہوا اور اس کے رہنما وطن چھوڑ کر بھاگ گئے، تاہم تین سال گزر جانے کے بعد ابھی تک دنیا نے افغان طالبان حکومت کو باضابطہ طور پر تسلیم نہیں کیا ہے، جس کی ایک وجہ خواتین کے حقوق پر عائد پابندیاں ہیں۔
کابل میں یونیورسٹی کی ایک 20 سالہ سابق طالبہ مدینہ نے خبر رساں ادارے اے ایف پی کو بتایا ’’لڑکیوں کے خوابوں کو دفن ہوئے تین سال گزر چکے ہیں۔ یہ ایک تلخ احساس ہے کہ ہر سال اس دن کا جشن ہمیں یاد دلاتا ہے کہ ہم نے کس طرح اپنے مستقبل کے لیے ہدف بنا کر کوششیں کی تھیں۔
