پاکستان کی سیکیورٹی فورسز نے کُرم اور شمالی وزیرستان میں خارجیوں اور افغان طالبان کی دراندازی کی کوشش ناکام بنادی، جوابی کارروائی میں 15 سے زائد خارجی اور افغان طالبان کے ہلاک ہونے کی مصدقہ اطلاعات ہیں۔
ذرائع کے مطابق 28 دسمبر کی صبح خارجیوں نے دوبارہ افغان طالبان کی پوسٹوں کو استعمال کرتے ہوئے پاکستان میں در اندازی کی کوشش کی، خارجیوں اور افغان طالبان نے ملکر پاکستانی پوسٹوں پر بھاری ہتھیاروں سے بِلااشتعال فائر کھول دیا۔ جس کا سیکورٹی فورسز نے منہ توڑ جواب دیا۔
مصدقہ ذرائع کے مطابق مؤثر جوابی فائرنگ سے 15 سے زائد خارجیوں اور افغان طالبان کی ہلاکتوں اور متعدد کے زخمی ہونے کی مصدقہ اطلاعات ہیں، افغان طالبان 6 پوسٹیں بھی چھوڑ کر بھاگ گئے۔
ذرائع کے مطابق افغانستان کی طرف نقصانات مزید بڑھنے کی بھی اطلاعات موصول ہوئی ہیں، پاکستان سیکیورٹی فورسز کا کوئی جانی نقصان نہیں ہوا، نا ہونے اور صرف تین زخمی ہونے کی اطلاعات ہیں۔
ذرائع کا کہنا ہے کہ پاکستان نے بارہا عبوری افغان حکومت سے فتنہ الخوارج کو پاکستان کے خلاف اپنی سرزمین استعمال نہ کرنے کا کہا ہے لیکن افغان طالبان فتنہ الخوارج کی مسلسل معاونت کر رہے ہیں۔
