کراچی : افغان باشندوں کو پاکستانی شناختی کارڈ کے اجراء کے معاملے میں اہم پیشرفت سامنے آئی ہے، ایف آئی اے نے ملوث افراد کیخلاف کارروائی کا فیصلہ کرلیا۔

اس حوالے سے ذرائع کا کہنا ہے کہ ایف آئی اے کی تحقیقات آخری مراحل میں داخل ہوگئیں، ذمہ دار نادرا اہلکاروں کا تعین کرلیا گیا۔

اے آر وائی نیوز کی رپورٹ کے مطابق نادرا ذمہ داران نے افغان باشندوں کو شناختی کارڈ کے اجراء کیلئے پاکستانی خاندانوں کا رکن ظاہر کیا۔

پاسپورٹ آفس سے ایک افغان سمیت دیگر ایجنٹوں کی گرفتاری کے بعد تحقیقات کا آغاز کیا گیا، پاکستانی شناختی کارڈ کا حامل افغان باشندہ مجیب اللہ پاکستانی پاسپورٹ حاصل کرنا چاہتا تھا۔

مجیب اللہ کو جس پاکستانی خاندان کا رکن ظاہر کیا گیا نادرا سے اس فیملی کا ریکارڈ طلب کیا گیا، نادرا کی جانب سے ریکارڈ فراہمی کے بعد متعلقہ نادرا اہلکاروں کے بیانات لئے گئے۔

تحقیقات کے آخری مرحلے میں مبینہ ملوث نادرا اہلکاروں کی گرفتاری عمل میں لائی جائے گی، نادرا کی جانب سے بھی محکمانہ تحقیقات میں متعلقہ اہلکاروں کے خلاف ایکشن لیا گیا ہے۔