اسلام آباد: آئی ایم ایف پروگرام کی منظوری کے بعد روپے کی قدر مزید بڑھنے اور امریکی ڈالر کی قدر کم ہونے کا امکان ہے۔
تفصیلات کے مطابق زرمبادلہ ذخائر اور روپے کی قدر میں اضافے سے متعلق وزارت خزانہ نے رپورٹ جاری کردی۔
جس میں آئی ایم ایف پروگرام کی منظوری کے بعد زرمبادلہ ذخائر اور روپے کی قدر مزید بڑھنے کا امکان ظاہرکیا گیا ہے۔
وزارت خزانہ نے بتایا کہ ایک سال میں زرمبادلہ ذخائر میں ایک ارب 59 کروڑ 80لاکھ ڈالرز کا اضافہ ہوا جبکہ ایک سال میں امریکی ڈالر کے مقابلے روپے کی قدر 21 روپے 13 پیسے بڑھ گئی۔
رپورٹ میں بتایا گیا کہ اسٹیٹ بینک کے ذخائر ایک سال میں ایک ارب 53کروڑڈالرزبڑھ گئے اور کمرشل بینکوں کے ذخائر میں 6 کروڑ 80 لاکھ ڈالرز کا اضافہ ریکارڈ ہوا۔
وزارت خزانہ کا کہنا تھا کہ زرمبادلہ کےمجموعی ذخائر 14 ارب 77 کروڑ 60 لاکھ ڈالرز ہوچکے جبکہ اسٹیٹ بینک کے ذخائر 9 ارب 40 کروڑ 30 لاکھ ڈالرز پر پہنچ گئے اور کمرشل بینکوں کے پاس 5 ارب 37 کروڑ 30 لاکھ ڈالرز کے ذخائر ہوچکے ہیں۔
رپورٹ کے مطابق ایک سال قبل زرمبادلہ کے مجموعی ذخائر 13 ارب 17 کروڑ 80 لاکھ ڈالرز تھے اور اسٹیٹ بینک کے پاس ایک سال پہلے 7 ارب 87 کروڑ 30 لاکھ ڈالرز اور کمرشل بینکوں کے پاس 5 ارب 30 کروڑ 50 لاکھ ڈالر کے ذخائر تھے۔
وزارت خزانہ نے مزید بتایا کہ ایک ڈالر 278 روپے 51 پیسے پر آگیا جبکہ یک سال قبل 299 روپے 51 پیسے کا تھا۔
