کراچی: معروف اداکارہ روبینہ اشرف نے بتایا کہ کووڈ 19 کا شکار ہونے کے بعد انہیں مختلف کیفیات کا سامنا کرنا پڑا تھا، 5 دن بالکل ٹھیک رہنے کے بعد اچانک ان کی حالت شدید خراب ہوگئی اور انہیں اسپتال منتقل ہونا پڑا۔
اے آر وائی نیوز کے پروگرام گڈ مارننگ پاکستان میں روبینہ اشرف نے اپنی بیٹی کے ساتھ شرکت کی اور کووڈ 19 کے دوران اپنی حالت کے بارے میں بتایا۔
روبینہ کا کہنا تھا کہ کووڈ 19 کے دوران اگر کسی کو ہلکی علامات بھی ہوں تو اس کے بعد انہیں مختلف مسائل کا سامنا ہوسکتا ہے، جیسے ان کے ایک عزیز کو کووڈ 19 سے صحت یاب ہونے کے بعد امراض قلب کے شدید مسائل ہوگئے۔
انہوں نے بتایا کہ ٹیسٹ پازیٹو آنے کے بعد وہ 5 دن تک بالکل ٹھیک رہیں اس کے بعد جب وہ آئی سی یو منتقل ہوگئیں تو اس دوران کی انہیں کوئی بات یاد نہیں تھی۔
روبینہ کی بیٹی نے بتایا کہ اسپتال میں داخل کرلینے کے بعد گھر والوں کا کوئی ملنا جلنا نہیں تھا، اس کے بعد انہیں ایک رات اسپتال سے کال آئی کہ والدہ کو سانس لینے میں تکلیف کا سامنا ہے لہٰذا انہیں آئی سی یو میں منتقل کیا جارہا ہے۔
روبینہ کا کہنا تھا کہ اس دوران ان کا بیٹا آ کر وہاں بیٹھا رہتا تھا انہیں بالکل یاد نہیں کہ وہ کب آتا تھا یا ان کی بیٹے سے کیا بات ہوتی تھی۔
روبینہ کی بیٹی نے بتایا کہ والدہ کو ہیلوسی نیشن بھی ہونے لگی تھی اور وہ پرانی باتیں یاد کرنے لگی تھیں، بعد ازاں ان کے پھیپھڑوں کی حالت بہتر کرنے کے لیے لائف سیونگ انجیکشنز بھی لگائے گئے۔
