The news is by your side.

Advertisement

اپوزیشن کی بازی پلٹنے کے لیے وزیراعظم بھی متحرک

 اپوزیشن کے سیاسی جماعتوں سے رابطوں میں تیزی کے بعد وزیراعظم بھی متحرک ہوگئے ہیں اور  پارٹی کا اہم اجلاس پیر کو طلب کرلیا ہے۔

ملک میں سیاسی ماحول گرم ہوتا جارہا ہے بالخصوص گزشتہ چند ہفتوں کے دوران حکومتی اتحادی جماعتوں اور اپوزیشن جماعتوں کے رابطوں اور اپوزیشن کی جانب وزیراعظم کے خلاف تحریک عدم اعتماد کے اعلان نے سیاسی درجہ حرارت کو بڑھا دیا ہے، سیاسی صورتحال کے تناظر میں اپوزیشن کے ساتھ حکومت بھی اپنے پتے کھیلنے کے لیے تیاری کررہی ہے۔

اے آر وائی نیوز کے مطابق اپوزیشن کے سیاسی جماعتوں بالخصوص حکومتی اتحادی جماعتوں سے رابطوں میں تیزی کے بعد وزیراعظم عمران خان بھی متحرک ہوگئے ہیں۔

وزیراعظم نے کل (پیر) تحریک انصاف کی مرکزی تنظیم کا اہم اجلاس طلب کرلیا ہے، سینٹرل ایگزیکٹو کمیٹی کا یہ اجلاس دوپہر سوا 12 بجے ہوگا۔

ذرائع کے مطابق اجلاس میں اتحادیوں سے رابطوں پر مشاورت اور اہم فیصلے کیے جائیں گے جب کہ عوامی رابطہ مہم کو آگے بڑھانے کے حوالے سے تجاویز پر بھی غور کیا جائے گا۔

ذرائع نے بتایا کہ اجلاس میں منڈی بہاالدین سمیت چار سے پانچ بڑے جلسوں پر مشاورت کی جائے گی اور پی پی پی اور جے یو آئی ف کے اعلان کردہ لانگ مارچوں پر بھی غور کیا جائے گا۔

اجلاس میں شاہ محمود قریشی، اسد عمر، فواد چوہدری، پرویز خٹک، شفقت محمود، فرخ حبیب، علی زیدی، قاسم سوری، خسرو بختیار شرکت کریں گے۔

ذرائع کے مطابق سینٹرل ایگزیکٹو کمیٹی کے اجلاس کے بعد وزیراعظم نےترجمانوں کااجلاس بھی کل دوپہرایک بجےطلب کرلیا ہے جس میں عمران خان ترجمانوں کو گائیڈ لائن فراہم کریں گے۔

Comments

یہ بھی پڑھیں