میڈرڈ: اسپین میں شہری برفباری کی تباہ کاریوں سے سنبھلے نہیں تھے کہ سمندری طوفان نے تباہی مچادی جس کے نتیجے میں 9 افراد ہلاک ہوگئے اور نظام زندگی درہم برہم ہوگیا۔
تفصیلات کے مطابق اسپین میں سمندر کے اطراف شہری آبادی میں طوفان نے قیامت ڈھادی، شدید برفباری کے بعد تیز ہواؤں اور سمندری طوفان سے نظام زندگی مکمل طور پر مفلوج ہوگیا۔ اب تک ہلاکتوں کی تعداد 9 ہوگئی جبکہ درجنوں تاحال لاپتہ ہیں۔ انتظامیہ نے مزید ہلاکتوں کا خدشہ ظاہر کردیا۔
غیرملکی خبررساں ادارے کے مطابق اسپین کے مشرقی حصے میں سمندری طوفان کے باعث کئی دکانیں اور ریستوران متاثر ہوئے، جبکہ متعدد مکانات بھی تباہ ہوگئے۔ مختلف حادثات میں اب تک نو افراد زندگی کی بازی ہار چکے ہیں۔ ریسکیو عملے کا کہنا ہے کہ ایک دو افراد کی لاشیں تباہ شدہ گھر سے نکالی گئیں۔
ریسکیو عملے کے مطابق متاثرہ علاقوں میں امدادی کارروائیاں جاری ہیں، جبکہ لاپتہ افراد کو بھی تلاش کیا جارہا ہے، خطرے کے پیش نظر بے گھر ہونے والے افراد کو محفوظ مقامات پر وقتی طور پر منتقل کیا گیا ہے۔
خیال رہے کہ اسپین میں گزشتہ سال ستمبر جبکہ 2018 اکتوبر میں بھی سرد موسم میں سمندری طوفان نے درجنوں افراد کو لقمہ اجلا بنایا تھا۔ موجودہ طوفان نے اسپین میں ماضی کے ریکارڈز توڑ دیے ہیں۔
