ٹی 20 ورلڈ کپ جیتنے کے بعد جہاں ہر بھارتی کھلاڑی خوشی مسکرا رہا تھا وہیں ان کے آنکھیں مسکراتے چہروں کے ساتھ خوشی کے آنسوؤں سے نم تھیں۔
من چاہی مراد پا لینا انسان کے لیے سب سے بڑی خوشی ہوتی ہے اور بات ہو کھیل کی تو ورلڈ کپ جیتنا ہر کھلاڑی اور ٹیم کا خواب ہوتا ہے اور جب یہ خواب تعبیر پاتا ہے تو اس پر خوشی سے آنکھیں چھلک پڑنا ایک فطری عمل ہے۔
ایسا ہی ایک منظر گزشتہ روز بارباڈوس میں دیکھنے میں آیا، جہاں بھارتی کرکٹرز ورلڈ کپ کا فائنل جیتتے ہی خوشی سے ایسے نہال ہوئے کہ ایک دوسرے کو گلے لگایا، میدان میں ہی بھنگڑے ڈالے لیکن خوشی سنبھالے نہ سنبھلی تو مارے خوشی کے ان کی آنکھوں سے آنسو چھلک پڑے۔
View this post on Instagram
کیمرے کی آنکھ نے اس مسحور کن لمحات کو قید کر لیا جس میں بھارتی کپتان سمیت کھلاڑی بے پایاں مسرت سے دمکتے چہروں کے ساتھ خوشی کے مارے بھر آنے والی آنکھیں بھی پونچھتے رہے۔
کپتان روہت شرما، ویرات کوہلی، ہاردیک پانڈیا اور محمد سراج بچوں کی طرح روتے اور ساتھ من پسند کھلونا مل جانے والی خوشی پر مسکراتے بھی رہے۔
View this post on Instagram
جہاں کھلاڑی خوشی کے مارے روتے نظر آئے وہیں بعض اپنی اہلیہ کے گلے لگ کر انہیں اپنی خوشی میں برابر کا شریک قرار دیتے دکھائی دیے۔
اس موقع پر ڈک آؤٹ میں موجود بھارتی ٹیم کے کوچنگ اسٹاف اور دیگر پلیئرز سے بھی رہا نہ گیا اور وہ جیت کا جشن منانے دوڑ کر میدان میں آ گئے اور ایک دوسرے کو گلے لگا کر مبارک باد پیش کی۔
ویڈیوز: ٹی 20 ورلڈ کپ جیتنے کی خوشی میں بھارتی کھلاڑیوں کے میدان میں بھنگڑے
