ٹی وی اور فلم اداکار آغا مصطفیٰ نے ایک نجی ڈیجیٹل چینل کو انٹرویو دیتے ہوئے اپنی ناکام محبت کی کہانی سنا دی۔
ٹی وی ڈرامے سرِ راہ میں شان دار کردار ادا کرنے والے آغا مصطفیٰ حسن نے ایک انٹرویو میں بتایا کہ گزشتہ چند سال ان کی زندگی کے سخت سال رہے، انھوں نے ایک لڑکی سے ڈھائی سال تک محبت کی جس نے انھیں قبول نہیں کیا۔
آغا مصطفیٰ کا کہنا تھا کہ جس لڑکی کی محبت میں وہ گرفتار تھے، اس کی شرط تھی کہ اگر وہ اداکاری نہیں چھوڑتے تو وہ ان سے شادی نہیں کرے گی۔
معروف اداکار نے انکشاف کیا کہ وہ اپنا کیریئر بھی چھوڑنے کے لیے تیار ہو گئے تھے، ایک ایسا کیریئر جو اُن کا جنون تھا، وہ اتنے سنجیدہ تھے کہ انھوں نے اللہ سے مدد مانگی۔
آغا مصطفیٰ کے مطابق جب وہ کیریئر کے حوالے سے شدید پریشانی میں گرفتار تھے کہ کیا کرے اور کیا نہ کرے، تو ایسے میں ہدایت کار کی جانب سے فون آیا، انھوں نے کہا کہ مجھے اس سے اشارہ مل گیا کہ کس طرف جانا چاہیے۔
واضح رہے کہ آغا مصطفیٰ نے حال ہی میں اے آر وائی ڈیجیٹل کے ڈراما سیریل ’سر راہ‘ میں اداکاری کے شان دار جوہر دکھائے، ان کی اداکاری کو بہت پسند کیا گیا۔ اس سیریل کی دیگر کاسٹ میں صبا قمر، حریم فاروق، سنیتا مارشل و دیگر شامل تھے۔
