The news is by your side.

Advertisement

وفاق کا نہیں پتا، سندھ میں پی پی حکومت وقت پورا کرے گی: آغا سراج

کراچی: آغا سراج درانی نے کہا ہے کہ پاکستان میں سیاسی حالات ہر گھنٹے تبدیل ہوتے ہیں، وفاق کا نہیں پتا لیکن سندھ میں پیپلز پارٹی حکومت اپنا وقت پورا کرے گی۔

تفصیلات کے مطابق اسپیکر سندھ اسمبلی آغا سراج درانی نے احتساب عدالت میں پیشی کے موقع پر میڈیا سے گفتگو کرتے ہوئے کہا کہ پاکستان میں سیاسی حالات ہر گھنٹے تبدیل ہوتے ہیں، وفاق کے حالات کا مجھے پتا نہیں لیکن سندھ میں پی پی حکومت اپنا ٹائم پورا کرے گی۔

آغا سراج درانی سے ایک صحافی نے سوال کیا کہ سیاسی ماحول میں کیا تبدیلی کی فضا آ رہی ہے؟ انھوں نے جواب دیا کہ تبدیلی تو ڈیڑھ سال پہلے آ گئی تھی۔ ایک اور سوال کے جواب میں انھوں نے کہا کہ ضمانت کے بعد اچھا محسوس ہو رہا ہے، آزادی بالآخر آزادی ہوتی ہے، ہماری ضمانتیں ہونا اللہ کی مہربانی ہے۔

ان کا کہنا تھا کہ ہائی کورٹ کا فیصلہ پڑھیں تا کہ پتا چلے میرے ساتھ کتنی زیادتی ہوئی۔

آغا سراج نے اسٹوڈنٹ یونین کے حوالے سے کہا کہ یونین ذوالفقار بھٹو نے بنائی اسی سے پیپلز پارٹی کا جنم ہوا، پیپلز پارٹی نے ہمیشہ اسٹوڈنٹ یونین کی بحالی کی بات کی ہے، طلبہ یونین سے نکل کر ہی بچے سیاست اور اقتدار میں آتے ہیں، طلبہ یونین لیڈر شپ ضروری ہے، پارٹی کو مضبوط طلبہ ہی بناتے ہیں۔

دریں اثنا، آغا سراج درانی کے خلاف آمدن سے زائد اثاثہ جات ریفرنس پر احتساب عدالت میں سماعت ہوئی، پی پی رہنما اور دیگر عدالت میں پیش ہوئے۔ تفتیشی افسر نے مفرور ملزمان سے متعلق رپورٹ عدالت میں پیش کی۔ تفتیشی افسر نے کہا کہ مفرور ملزمان کو اشتہاری قرار دینے کی کارروائی شروع کر دی گئی ہے، اخبارات میں اشتہارات بھی دے دیے گئے۔ بعد ازاں، احتساب عدالت نے ریفرنس پر سماعت 15 جنوری تک ملتوی کر دی۔

Comments

یہ بھی پڑھیں