کراچی : پاک سر زمین پارٹی اور سندھ حکومت کے درمیان معاہدے پر دستخط ہوگئے ، جس کے تحت سندھ میں آرٹیکل 140 اے کے تحت بلدیاتی نظام نافذ کرنے پر اتفاق کرلیا گیا۔
تفصیلات کے مطابق پاک سر زمین پارٹی اور سندھ حکومت کے درمیان معاہدہ طے پاگیا ، معاہدے کی کاپی اے آر وائی نیوز نے حاصل کرلی ہے۔
آٹھ نکات پرمشتمل معاہدے پر ناصر شاہ اور ڈاکٹرارشد وہرہ نے دستخط کئے ، جس کے مطابق سندھ میں آرٹیکل 140 اے کے تحت بلدیاتی نظام نافذ کرنے سمیت سیاسی ،انتظامی اور مالیاتی اختیارقانون میں ترمیم کرکےعوام نمائندوں کو دینے پر اتفاق ہوا۔
دونوں پارٹیوں میں صوبائی مالیاتی کمیشن کو حقیقی معنوں میں فعال کرنے اور ایس بی سی اے، کے ڈی اے، ایم ڈی اے،واٹر بورڈمیں میئرکراچی کو اہم کردار دینے پر اتفاق کیا گیا۔
سندھ سالڈ ویسٹ مینجمنٹ بورڈ اور ماسٹر پلان سمیت دیگر اتھارٹیز میں مئیر کو اہم کردار پر بھی دونوں جماعتیں متفق ہوگئیں۔
معاہدے کے متن میں کہا گیا کہ تعلیم اور صحت کے شعبے بھی مئیر کے اختیار میں ہوں گے ،میٹروپولیٹن کارپوریشن کے بجائے میٹرو پولیٹن حکومت کےنفاذپربات چیت جاری رہےگی جبکہ میئر کے براہ راست انتخابات کے لیے مزید بات چیت ہوگی۔
